LAR CHAKNA

Zoremi Hmar Zote

Kan khawvel changkang zelin a ken tel zinga a tha zawng leh chhe zawnga kan nun nghawng nasa ber chu social media hi a ni awm e. Thil reng reng, a tha zawnga thlira thil tha ber ber ni thei pawh a chhe zawnga thlir bawk chuan thil tha lo a nihna lai hai lan tur a awm ve zel a, chung zinga langsar ber chu social media bawk hi a ni.
Kan nunphung, kan culture, kan hnam zia leh kan khawtlang nun zawng zawng hi, hun hmasa lam leh hman lai atanga chhût chuan khawvel ram dangte ang thovin nasa takin a danglam lo thei bik lo va, hun kal zel avanga thil lo danglam tain a phûm bo mek ze mawi leh duhawm tak tak tam tak an pil bo chho mek niin a lang ta bawk a, a bikin Mizoteah chuan thu kan khuh thiamna, chapo nih hlauhna te, hna thawhna thil chauh ni lo, mi dang nena kan nunhona kawnga tlawmngaihna te pawh a kiam nasa ta hle niin a hriat a ni. Mihring kan nihnaa inzah tawnna te, mi dang thinlung dêng na thei tur nia kan hriat tawngkam hmang lo hram tura kan inven tawn thinna leh, hnam bil thil leh kohhran thila fiamthu thawh duh ngai lo kan hnam ze mawi kha duh ngat ila chuan kan nei leh thei reng tih hi a chiang a ni.
Tun lai thalaite, hnam pui zawk leh ram changkang zawka chengte, an vai chuan a ni kher lo va, a nawlpui ten an duh leh châk chu làr a ni. Talent nei tha tak tak, an vanneihna lârpui ta tam takte nun chu nuam dawn riaua hriatna leh awhna an nei nasa thin a, an lârna chuan hausakna keng tel tlata an hriat bawk avangin mi lârte nun chuan nasa takin a hîp a, anmahni ang nih châkna chuan kawng maksak tak takah a hruai lut fo ta rêng a ni. Midang aia mak bik leh danglam bik nih tuma teihtawp chhuah a, mahni taksa siam danglam a, rapthlak pui puia suasam ching lah chhiar sen loh an awm ve bawk a, chu’ng mi ten an tum ber leh a khai khawmna chu lâr duhna bawk a ni. Talent tha tak dawng, lâr lo thei lo khawpa thil thlâwn pêk dawngte chu mi vannei bik an ni mai tih pawm duh lo, tum leh châk vang ngawta lâr theih nia ngai tlat, a tuma tum ve ta tlat mai te tâwpna chu a duhawm lo thlangpui. Entu tam tak neih duh vang ringawta tual that lai tilang duh hial pawh zu awm a maw le!
An mi ngaihsante ngaihsan an tina hle a, a thenin anmahni hmel ang thei turin vawi duai lo an inzai danglamtir bawk a. An taksaah an hming tattoo te chhû-in an inziak râng a, an nun leh hun tha, an ngaihtuahna leh rilru puthmang tinreng chu an mi ngaihsante pualin an hmang ta vek emaw tih hial tur a ni; a tul phawt chuan an thih ai pawh an thi duh hial tih lah an zêp na hek lo. =an zawng inang lo te an intibuai a, an inhnialin nasa takin an inbei a, insual buaina atanga tual thahna thlengin a thlen phah fo mai. Hei hi mi lârte hûhâng ngahzia leh an lârnain sal ang maia a phuar beh, an fans nun an nghawng dan a ni. An ngaihsan zawngte tluangtlam taka ngaisang mai, buaipui khu chûk lem lo tam tak zingah, an ngaihsan zawngte Pathian biak deuh thaw, eng dang mah pawisa lo, âtchilh bur maite chu mi tam tak tan mi hlauhawm an lo ni ta thin a ni.
Keini, Mizote ve thung hi le…Computer, TV, Phone, engkim mai kan nei ve vek si a, hê lâr châkna hian min tuam ve rêng em, kan nun a nghawng ve em tih leh, chu chuan thil pawi a thlen ve ang em tih zawhna hi kan inzawt a nih chuan, a chhânna chu awlsam tê, ‘Teh rêng mai’ tih hi a ni. Social media-ah hian Facebook kan khawih nasa ber a, thalai chauh lo, kum lama upa tawh deuh leh mi nawlpui chuan kan khawih deuh vek ti ila a sual lovang. Youtube phei chu naupang/nautê thlengin kan hlimpui a, kan buaipui bawk a ni lo’m ni! =halai leh naupang deuh zawk ten Instagram an khawih nasa hle bawk a, twitter a ni leh a. hêng ho hi khawih a nawm chhan chu sawi duah ngai lovin kan hre deuh vek thovin a rinawm. Mi lâr leh kan ngaihsan zawngte kan follow thei a, an zâi, an thlalak mawi tak takte leh an thil tih apiang kan lo hmu ve thei a, chu mai chu ni lovin keimahni ngei pawhin kan thil tih apiang kan dahin kan pho lang ve thei bawk a. Kan tuina zawng leh kan thiam thil te, kan thlalak hlu tak tak te kan pho lang ve thin. Instagram bikah phei chuan zuitu(Followers) ngah hi khawvel hian a inelna ropui ber hi a ni tawp mai a ni!
Kan thalaite pawhin an hai bik miah lo. Khai le…i tunu, i tupa, i fanu, i fapa, i farnu leh i laizawnnu, i nutapa kha lo chîk ve rawh le. Tun laiah hian a hmei apain social media lamah an inzuar sup sup a nia aw…Lâr duh vang ngawr ngawr, zuitu ngah duh vang ngawr ngawra tleirawl kum sawmpanga atanga sawmpariat vel bâwr lek tur ten an hnute an intihlansiak te, zahmawh leh tawngkam maksak tak taka live-a an râk vel thin te hi Mizo naupang tih atan chuan a na lu hrat a ni; an hmel lah thup an tum der si lo, an zak tawh lo. Mak tia kan hawi mai mai lai hian kan fate an him em tih inenfiah a tha dawn a nia. Khawpui chauh an ni lo, thingtlang lam pawh an diau hlek lo! Nula pangngai tawh, zuitu ngah duh vang leh thlirtu an tam poh leha nuam ti tlat, saruak ngata live ngam pawh kan kawl ta nual. Mizo kan la tlem si, hnam lian leh ropui tak tak mi maktaduai tam tak zinga awm ang kan kawl kim ve biai si hi lawmna chi a ni dawn em ni!
Facebook lama inzawrhna group a han awm tawp mai te hi a awlsam phian! (Zahthlak lutuk!) Pawisa hi a thawha thawh chhuah tura siam a ni a, kan thawh chhuah dan erawh a inang lo hle tih a lang reng mai. Mahni zahawmna han hralh tawp mai hi a engti kawng zawng mahin a hlu thei lo. Twitter lamah sex video kan zuar sup sup a, thalai inngaizawng ten an khawsa lai man tlawm tein an hralh hreh lo va, mahni chauha phusa lai zuar lah an kat nuk bawk. Nupa leh zelin an hun hmang lai an zuar phei hi chuan an mihringpuite zah lo mah se, nupaa siamtu tal chu zah se a tha tur a nia. Nu leh pa leh chhûng ten kan hriatpui thlapa ti leh kan phalna la thlapa ti an awm ka ring lo va, kan rin phak baka internet tawpzia leh, chu khawvela hleuh mek kan tu leh fate khawvel hi ngaihven ve deuh a va tha em tih beiseia sawi ka ni. Hetiang thil sawi nikhuaa an lo hnialna common ber chu, “Mi nunah lo buai suh, an nun a nia, an thu thu,” tih lam hawi hi a ni. A dik tho rualin midang nun ngaihven lo tan nunphung leh khawtlang chu siam that ngaihna a awm lovang.