Clean energy lamah khawvelin hmasawn zel ti
Union Power and New & Renewable Energy Minister R.K. Singh chuan October 31 khan renewable energy sources chuan khawvel electricity mamawh 65% chu kum 2030 ah pe thei tawh dawnin kum 2050 ah chuan 90% a pe thei tawh ang tiin a sawi.
Sixth Assembly of the International Solar Alliance (ISA) hawnna neiha thusawina a neihah Singh chuan, “Renewable energy sources chuan khawvel electricity mamawh 65% chu kum 2030 ah pe thei tawh dawnin kum 2050-ah chuan 90% a pe thei tawh ang,” a ti a.
Tun dinhmunah chuan khawvel mipui 80% vel zet chu fossil fuel import-a innghat ramah an la cheng a ni tiin a sawi bawk.
ISA president ni bawk Singh chuan tun hnai lawka New Delhi a G20 summit neihah pawh clean energy lama inleh tumna nasa tak kalpui ni se tih a nih thu a sawi bwk a.
“ISA din tirh a nih khan kan hmathlir ber chu solar energy solutions hmanga sustainable world siam a ni,” tiin a sawi a.
An tum ber chu kum 2030 a nih meuh chuan global renewable energy chu a let thuma tihpun a ni tia sawiin zero leh low emission technology te hmangin finance leh risk-sahring facility tha zawka renewable energy sector lama kalpuia nasa zawka hmalaka chetlak a ni tiin a sawi bawk a.
“Kan tangrual a nih chuan climate change harsatna kan hmaa awm mek hi kan hmachhawn thei a ni,” tiin a sawi bawk.
Co-president of the Assembly, Chrysoula Zacharopoulou, France’s Minister of State for Development, Francophonie and International Partnerships pawhin, “Climate change beihletnaa pawimawh berah International Solar Alliance chuan khawvel pum huapin solar energy lama hmasawnna nasa zawkin hma a la dawn a ni,” tiin a sawi bawk.
Ajay Mathur, Director General, ISA pawhin, “Kum 2020 hnu atang khan clean energy lama investment chuan 12 per cent annual growth a hmu tawh a, hei hi solar leh wind power project lama hmalakna avang a ni ber” tiin a sawi bawk a. Mahse, heti lama hma la ram chu tlem te chauh an la ni tia sawiin a bik takin Africa ramah chuan hmalakna hmel hmuh tur a la awm mang loa ti bawk.
ISA-ah hian member ram 116 lai awmin tun inhmuhkhawmnaah hian ram 20 atangin minister an tel a, ram 18-in an zawm leh dawn bawk.