A thil tum Israel-in a tihlawhtling thei ang em?

Hamas tena Israel mi 1,400 an tihhlum avanga Israel-in Hamas te laka air strike a kalpui atangin thla a chuang tawh a, lei lama a beihna pawh kar hnih a ni tawh bawk.
Israel chuan a tir phat atangin a tum ber chu Hamas te chu ‘militarily leh politically’ a nuaichimih a ti a. A thil tum chu tihhlawhtlin a hnaih tawh em? emaw, tihhlawhtlin theih a ni ang em?
Israel chuan bultan chauhah a inngai a, beihpui an thlak chuan a awh rei dawn a, a harsa dawn tih a sawi lawk bawk a. Israel Defense Forces (IDF) official pakhat chuan boxing match nena khaikhinin “Round 15 turah round 4-na a ni mek chauh,” tiin a sawi.
Israel-a tutemahin indonain a awhrei hun tur an sawi lo va. Kum 2017 khan Western thlawp Iraqi forces te khan Islamic State (IS) group te lak atangin Mosul laklet leh nan khan thla kua an hmang a ni. Israel hian thla tam tak inbeih nan hun an la hmang thei a, chutihrual erawh chuan international pressure a na tial tial bawk.

Military hloh
Israel chuan strikes 14,000 chuang a kalpui tawh a, hruaitu lawk tam tak a tihlum tawh a, chung zingah chuan senior Hamas commander te pawh an tel a. Heng atan hian ralthuam chi hrang hrang hman niin military expert leh Jerusalem Post newspaper editor pawh ni tawh Yaakov Katz chuan Israel in munition 23,000 chuang a kap chhuak tawh tiin a sawi.
Mosul indona nena khaikhin chuan Western allies te khan IS target beih nan khan bomb 500 vel chauh an hmang thung a.
Indona chhuah hnuah Gaza-ah mi 10,800 chuangin nunna an chan tawh a. Hamas enkawl health minstry chuan nunna chan zingah naupang 4,400 an tel, a ti.
Israel chaun hlawhtling takin Gaza strip chu chhim leh hmar angin a then hrang tawh an ti a, Gaza City chu an hualchhuak vek bawk tawh a. Tunah chuan khawpui laili laiah awm tawhin mahse thunun tia sawi theih a la ni lo thung a.
Israel-in ground offensive a kalpui chhan ber chu Hamas te haihchhama siam a tumna niin chu tak chu Hamas tena an tawrh nasat em em a ni mek a. Indona chhuah hmain Hamas te hian fighters 30,000 atanga 40,000 vel an nei anga ngaih a ni.
Senior Israeli defence official pakhat chuan Hamas fighter 10% chu chu 4,000 velin nunna an chan tawh tiin a sawi bawk.
Chutih lai chuan Israel chuan beihpui a thlak hnuah sipai 34 chauh a la chan thung a. Israeli intelligence leh security expert Yossi Kuperwasser chuan Israel chuan ground operation a neih fimkhur lutukin nunna chan tlem theih nan a kalpui a ti a.
Gaza hmar lamah Hamas engzah vel nge la awm a hriat theih loh a, tunnel ah fighter engzah nge la biru ang tih pawh hriat a ni lo va, chutiang bawkin chhim lama tlanchhia mipui nawlpui zingah engzah nge inphumru ang tih pawh a chiang chuang lo.

Urban warfare
Israel chuan intelligence leh military lamah chungnunna a nei a. Communications te hre ru theiin a duh chuan Gaza mobile phone leh internet network te pawh a titawp vek thei bawk a. Israeli jets leh drone te chuan hnuai lama thil thleng an hre vek thei bawk.
Ni tinin target thar 100 vel zet hmuchhuak zel niin Israeli defence lam chuan an insawi bawk a. mahse, indonain a awhrei poh leh a tlahniam tura ngaih niin loh theih lohin lei lama sipaite kutah a innghah a ngai bawk.
Israel sipaite chu ralthuam nei tha leh training nei tha an ni chungin urban warfare erawh thil dang daih a nih avangin harsatna an tawk lo thei lo dawn tih a ni bawk a.
Tun dinhmunah chuan Russia leh Ukraine tena Bakhmut khawpui inbeihna urban warfare an neih anga nasa kha chu Gaza-ah a la thleng lo thung a. IDF tena video an tihchhuah tam ber pawh tanks leh armour te chetlakna a la ni bawk.
Israel hian sipai 160,000 vel nei mekin heng bakah hian reservists 360,000 vel a neih bawk atangin Gaza ah 30,000 vel chauh a tirlut tia sawi a ni bawk.

Post-invasion plan
Hei tak hi Israel-in indona a kalpui tirha a sawi ber Hamas te chhut chimih chu tihhlawhtlin theih a ni em tih chu a ni. Senior Israeli officials te chuan ideology chu bomb leh silaimu hmanga tihchhiat theih a ni lo tiin a sawi a.
Hamas leader lawk zualte chu Gaza chhungah pawh an awm lem chuang lo tih ni bawkin Hamas dam khawchhuakte chuan chakah an inngai dawn tho tih a ni bawk. Chuvang chuan Israel-in a thil tum Hamas nuaichimih aiin ‘inhrem’ zawkah a tlahniam thei bawk a, 7 October thil thleng a awm nawn leh tawh loh nan hremna natak a lekkawh thei tih a ni bawk.
Indona a rei poh leh Hamas te tawrhna a nasa zual zel tura ngaih a ni a. Chutih laiin khawvel ram hrang hrang atangin inkahhaina siam vat tura nawrna a nasa em em tawh thung a. Civilian te tawrhna tihzangkhai nan Israel pawhin nikhatah darkar li lai a beihna a chawlhsan thin tur thu a sawi bawk.