Hruaitu nih inchuh

Kum nga dana neih thin ram hruaitu tur thlanna chu tluang taka zawhfel a lo ni leh ta a. Result nghah chhung a rei deuh dawn a, candidate thenkhat tan chuan phawklek chhung a rei duh dawn hle.
Ram leh hnam kaihhruai hna thawh hi a hautakin a hahthlak dawn tehlul nen, chutiang hna khirh leh hahthlak zet mai chu thawh tumin mi 174 ten an inchuh mup mup mai a ni a. Tlin loh palh pawha, hna hahthlak leh mawhphurhna sang bawk si thawh ngai ta lo tur chu, thawk huaina tur niawm tak a nih laiin, tuar na fe fe chu an awm leh ngeiin a rinawm.
Eng vanga hruaitu nih hi inchuh ta chiam thin nge kan nih? “A hahthlak si a, mawhphruhna a sang bawk si a, nangnin thawk zawk mai teh u” tia inhnawn inhnawn awm tak a nih laiin, hruaitu nih duha inchuhte hian hun tam tak, tha leh zung tam tak bakah, sum leh pai tam tak bakah, sum leh pai nei vak lote pawhin puk tur te pawh an la zawng hial thin lehnghal.
He ram hruaitu nih inchuha tling tate hian anmahni thlang tling tura mipui hnena an ngenna leh, thlan tlin an nih chuan ‘chu chu ka ti ang, ka thawk ang, ka tipuitling ang’ tia an intiamnate hi an hlenchhuak thin reng em tih chu zawhna pawimawh tak a ni nghal.
Party hrang hrangin Pathian kaihhruaina an chan avanga lawmthu sawiin an party inrelbawlna chu Pathian thu nen hmehbelna tur zawngin behchhanah Pathian thu an hmang thin a, ‘Pathian zarah’ an ti awl lo a. Pathian hi hleih nei ang deuha ngaih theih rum rumin kan chhuah mai ang tih pawh a hlauhawm hlel lo a ni.
Heti taka hruaitu nih inchuha, hruaitu nih kan chak em em chhan hi, a phena thildang, ram leh hnam kaihhnawih ni lo deuh hi chu a awm thin a nih a rinawm a, a chhan pawh hnathawh kawr hak inhuam thalhin ram leh hnam kaihhruai hna hi hun rei tak an lo thawk tawh thin a. Inthlan laia tlin an duh avanga tan an lak nasat ang em em hi chuan an tlin hnuah hna hi an thawk rim zui leh em em nagi lo a nih a rinawm a, kan ram dinhmun han en hi chuan.
Tun tum inthlanah hian tu te pawhin sawrkarna lo siam pawh ni se, hruaitu nih inchuha tan an laknate hre rengin, hnathawh tur pawh inchuh zui zel se, chutianga hna an thawh ngat chuan, election dawna rilru hah taka awm ngai lovin ngaihngam takin an awm thei ang.