Zirchianna awm lova sangha chhuah a pawi

Mamit District Level Fisheries Conservation Board Chairman V.L. Remliana, Mamit Bawrhsap ni bawk chuan, zirchianna awm lova Mizoram luidunga duh duha sangha khawi chi chhuah a ni thin chu a pawi a tih thu a sawi a; river ranching chungchang kan hriatchian lehzual a tul, tiin a sawi.
Nimin khan Mamit Bawrhsap ho hian DC Conference Hall, Mamit-ah World Fisheries Day denchenin DLFCB hi an thukhawm a. Bawrhsap V.L. Remliana chuan, ni 10, Oct atanga ni 18 Dec thleng luidung nungcha humhalh a nih angin mipuite pawhin kan zah a tul a ni, a ti.
Nimina thutkhawmah hian Mizoram Fisheries Amendment Act (2022) leh Mizoram Fisheries Rules (2019) zirchianna neih niin, kumin April thlaa Angling Festival Dapchuaha hlawhtling taka neih leh Luangpawl YMA Branch, Mamit te’n Angling Festival an buatsaihte thirletna neih a ni bawk.
Fisheries Department leh NGO-te thawhhona chak zawka a kal theih nan Rules and Responsibilities of YMA leh VC zirchianna hman a ni bawk a. YMA te’n luidung an humhalh chin hi mumal zawka humhalh nise, DFDO Mamit ah hriatpuina leh proposal te thehluh a, District Level Fisheries Conservation Board-in a pawmpui chauhte Protected area recognition/Sorkar hriatpuina chauha humhalh ni tawh se tihte rel a ni.