Kolasibah halpuah khap

Kolasib district-ah hunpui laiin halpuah, halmawi leh silai lem a mu nei chi khap a ni.
Kolasib district magistrate John LT Sanga chuan November 28 khan mipui hriattirna tichhuakin, Krismas leh kumthar vuakvetah halpuah leh halmawi hal avangin boruak tha lo tam tak a insiam bakah ri bengchheng siamin, boruak chhe lengvel hian mipui zingah hrileng a thlen thei a, mihring hriselna a khawih pawi thei a ni, tiin, hei vang hian Kolasib district mipui hriselna venhim a nih theih nan leh Krismas leh kumthar him leh thlamuang taka mipuiin an hman theih nan Sec. 144 of Cr.PC 1973 (Act No. 2 of 1974) tlawhchhanin thupek a chhuah tih a sawi.
‘Kolasib district huamchhungah Krismas 2023, kumthar 2024 vuakvetah halpuah, halmawi, sky lantern leh puakthei thil dang, boruak tha lo leh ri bengchheng siam thei chi reng reng lakluh, zawrh, hralh, hal leh hman khap a ni a. Naupang silai lem a mu kap chhuak thei chi reng reng lakluh, zawrh leh hman khap a ni,’ a ti.
He thupek zawm lote chu Section 188 of Indian Penal Code hmangin hrem theih an ni tih a sawi a. Thupek hian puan a nih atanga thla hnih chhung a huam dawn tih a sawi a ni.