Manchester City in RB Leipzig an lehthal

November 28, Thawhleh zan khan UEFA Champions League2023-24 khelh chhunzawm a ni a, Manchester City in an mikhual RB Leipzig an lehthal a, group champion an ni chiang nghal. RB Leipzig an hneh tuma goal thun Erling Braut Haaland chuan UCL record thar a siam nghal bawk.
Khelh hnih khelh hmabak la nei chunga last 16 lut chiang tawh Manchester City hian Etihad Stadium-ah German club hmasawn RB Leipzig an mikhual a, minute 33 chhung lekin an mualah si hnih an phur a, an dinhmun a chhe hman viau. Si hnih faia hnufual chungin chawlhlawk hmang mah se chawlhlawk hnu lamah goal thum an thun a, hnehna an chang ta tho thung.
Etihad Stadium-a lenglut RB Leipzig tan hian inkhel tan atanga minute 13-na lekah Loïs Openda chuan Blaswich siamsak atangin RB Leipzig hmahruaina goal a thun. Hma takah goal chhuah mah se champion lai City an insiamtha thei chuang lo va, chawlhlawk hmain goal dang an chhuah belh leh. Goal hmahruai thuntu Loïs Openda chuan minute 33-naah Simons siamsak atangin RB Leipzig goal hnihna thunin an hmahruaina a tizau a. Champion lai lakah si hnih faia hmahruai chungin chawlhlawk an hmang.
Chawlhlawk hmain goal thun thei lo mah se City in chawhlawk an hmang tangkai a, chawlhlawk hnu lamah goal an thun thuai. Bench atanga lut Julian Alvarez leh Jeremy Doku ten City an fuih phur viau a, danglamna lian tak an thlen. Goal thun tuma tan khawh nasa tak City tan hian minute 54-na lekah Erling Braut Haaland chuan Phil Foden siamsak atangin goal a thun a, an si phurh a sut then. Haaland hian champions league-ah goal 40 a thun tling chiah a, UCL-ah goal 40 thun tling rang ber record thar a siam. Haaland hian UCL-ah goal 40 thun tling turin game 35 chiah a mamawh. Champions League ah goal 40 thun tling rang ber ni thin chu Ruud van Nisterooy a ni a, ani hian goal 40 thun turin game 45 a mamawh thun a. Haaland hian goal 40 thun turin Nistelrooy ai hian game 10 zetin a mamawh tlem zawk. City tana vul tak Haaland hian inrinni zan khan English Premier League-a goal 50 thun tling rang ber record thar a lo siam tawh a. Thawhleh zan khan hnuhma ropui dang hnutchhiah belh lehin, inelna ngaihhlut hlawh tak Champion League-a goal 40 thun tling rang ber a ni ta a ni.
Haaland goal thun hnuin City an phur thar viau a, goal thun tumin an mikhualte an nawr nasa hle. An thawhrim rah an seng a, hun tawp dawn hnaih lamah goal hnih an thun belh. Minute 70-naah goal hmahruai siamchhuaktu Phil Foden chuan defender Gvardiol siamsak atangin an goal hnihna a thun a, an si phurh a sut. 2-2 a nih hnuin City an khel tha leh zual sawt a, RB Leipzig in hlauhawm an siam hleithei meuh tawh lo. Khel tha tak City tan hian Jullian Alvarez chuan minute 87-naah hma an hruai letna goal a thun. Alvarez goal thun hnu hian hun tawp thlengin goal dang a luh belh thei tawh lova, City chuan hnehna changin, point thum an hmu leh ta a ni.
An mualah hnehna an chan leh tak vangin Manchester City hi Group G-ah chan champion chiang nghal. Khelh khat khelh hmabak a la awm chungin Group G hi chinfel a ni tawh. Champion lai City chu group champion ni chungin an tlang chiang tawh a. RB Leipzig pawhin khelh nga atanga point 9 hmuin last 16 an lut chiang tawh bawk a. An mualah si hnih faia Red Star Belgrade hnehtu Young Boys chuan Europa League an khelh chhunzawm dawn bawk.
Young Boys hian Wankdorf-a an mikhual Red Star Belgrade lakah minute 8-naa Kosta Nedeljkovic own-goal hmangin hma an hruai a. Lewin Blum chuan minute 29-naah an goal hnihna thunin, UCL season kal mekah a vawi khat nan an chak a, Europa League last 16 playoff khel turin an tlin phah.
Champion lai Manchester City hian champion nawn leh tumin tan an khawh a, an squad a chhahtha bawk a, champion nawn leh turin rin an kai viau bawk a ni.