Australian Open draw-ah Nadal a tel

Hliam avanga kum khat dawn a chawlh hnuah inelna hmachhawn tura Rafael Nadal-a khelmual luh tan hun tur hriatchian a nih hnu lawkah kumthar January thlaa khelh tur Australian Open draw list-ah a hming tarchhuah zui leh a ni.
Melbourne Park-a vawihnih champion tawh Nadal hian tunhnai khan social media lamah Australian Open inbuatsaihna warm-up Brisbane International chu khelmuala a kirlehna tur a nih thu a lo puang tawh a, kum khat chhunga grand slam tournament hmasaber khel tur list zingah an telh zui ta phawt a ni.
Tarlan tawh thin angin, hliamin a tihbuai chhoh tak reng Nadal hi kumin Australian Open second round-a na nei chunga a tlak hnu khan compe-tition-ah a chhuak leh ta lo hmiah a, a kephah hliam dam hlei thei lo leh a khel bawr hliam kha a nghet ru riau a, kum tharah pawh hian eng dinhmunah chiah nge a din leh dawn hriatthiam har tak niin a lang.
Nikum mai kha chuan Nadal hian final-a a khingpui Russian Daniil Medvedev hnehin a tumhnihna atan Australian Open title a hlawhchhuak a, kha kha grand slam title 22 a lakna niin, grand slam title lak tam kawnga a elpui lianber Novak Djokovic nen an la inlehthal zak zak lai a ni a, mahse, hliamin a tihbuai zui tak tlat avangin Serb a pha ta lo a; kumin May thla khan kum thar 2024 hi tour-a a season hnuhnungber a nih tawh tur thu a puan zui tak avangin title lak tam lama pahnih ngawta a phak tawh lo Djokovic chu a pha lo hlen dawn ta niin a lang.
Defending champion leh world number one ni bawk Djokovic pawh Ningania tihchhuah Australian Open main draw-ah hian hmuh tur a awm leh chiah a; Melbourne Park-a champion ngun ber a nih mekna belhchhahin he hmuna a title 11-na tur leh mipa zinga grand slam title 24 la tling awmchhun a nihna record belhchhah turin Australia leilungah hian a major tityle 25-na tur a beisei leh dawn a, Serb kal fal lutuk tur hi Spaniard hian dang zo tak ang maw?
Kum 37 mi Nadal ang bawka hliamin a tihbuai rei dang Australian Nick Kyrgios phei chuan kumin chhung hian grand slam tournament pali a khel thei lo fai vek a, January thla Australian Open draw-ah pawh a la lang ta lo cheu!
Kum 28 mi Kyrgios hi kum 2022 khan Wimbledon finalist rawn ni chhoin, hmalam hun eng tak a neih a rawn chhemlian a, chutih laiin banrek, khup leh kephah hliamin a tibuai zui ta tlat a, kum thara major tournament hmasa-berah pawh kan hmu leh dawn ta lo niin a lang a, Australian Open draw-a lang lo langsar a ni.
Great Britain star rualkhat – Andy Murray, Cameron Norrie, Jack Draper, Katie Boulter leh Jodie Burrage-te chu direct entry pek an ni.
Hmeichhe world number one Iga Swiatek leh Australian Open defending champion, world number two ni bawk Aryna Sabalenka-te pawh hmeichhe lama inlan tur langsar an ni leh.
Anni pahnih bakah hian Mel-bourne Park-a champion hlui pathum – Naomi Osaka, Caroline Wozniacki leh Angelique Kerber-te pawh nau neih chawlh an hman zawh tawh dawn avangin Melbourne Park kaltlang hian tour-ah an kirleh thei tawh dawn bawk a ni.
Australian Open hi January ni 14-a khelh tan tur niin,January ni 28 men’s singles final hmangin an khar ang.