CM-in MAHCO hotute kawm

Chief minister Lalduhoma chuan Nilaini khan a pisaah Mizoram Apex Handloom & Handicraft Cooperative Society Limited (MAHCO) Board of Directors a kawm a. MAHCO hmalak dan leh hmachhawp an neih a sawipui.
Chief minister chuan a bial chhungah puantaha eizawng an tam avangin an harsatna thui tak a hriatpui ve tih hrilhin, puantahtute hmasawnna atan sawrkarin hma a la nasa dawn tih a sawi. An harsatna leh dinhmun, hmalak zel an tum dan chu ziaka pe turin a hrilh a. Hlawhtlin ngei tuma ruahmanna an siam chu a theih anga bawhzui sak a inhuam tih a hrilh a ni.
MAHCO chairman Lalrinkima chuan an dinhmun tlangpui leh harsatna an neih a sawifiah a. Hmalakna tura project siamte sawrkar laipui lama a luh thlak ve zel theih nan Mizoram sawrkarin hma lo laksak (approve) thin se an duh tih a sawi.