Gazan te chhuak tura tih dik lo : Blinken

US Secretary of State Antony Blinken chuan Palestinians te chu Gaza chhuahsan tura nawr tur an ni lo, boruak a muanawm veleh an let leh tur a ni a ti.
Blinken chuan Israeli minister thenkhat tena Palestinians te chu hmun dangah inbengbel rawh se an tih chu a dem thu a sawi bawk. US official hi Middle East tour neia kualin tunah Qatar-ah a awm mek a ni.
Hetih lai hian northern Gaza-a refugee camp-ah mi thahnem tak tihhlumin an awm a. Building tihchhiat avanga mithi ruang let rem rum footage tihchhuah a ni a. Israel sipaite chuan engmah sawi an la nei duh lo bawk.
Hei mai bakah nikhat chhung lekin southern city Khan Younis ah Palestinians 60 chuang thahin an awm tia sawi a ni bawk a.
Jabalia camp refugee te awmna hi Israel in 7 October a Hamas tena an ram a beih avanga indona a puan hnuah beihin a awm fo tawh a.
Israel chetlak hnuah mi 22,000 chuangin nunna an chan tawh tiin Gaza-a Hamas-run health ministry chuan a sawi a. Israel-in a bomb chhunzawm zel ava ngin tun hnai darkar 24 chhungin nunna chan 113 an awm a ti bawk.
“Palestinian civilians te hi boruak muanawm veleh an let leh tur a ni” tiin Blinken chuan a sawi a. “Gaza chhuahsan tura nawr theih an ni lo,” tiin a sawi bawk.
Israel far-right Finance Minister bezalel Smotrich chuan a hma in Palestinians te chu Gaza chhuahsan tura lo ti tawhin Israelis ten inbenbel nan hmangin ‘thlaler an vul tir ang’ tiin a sawi a.
National Security Minister Itamar Ben-Gvir pawhin buaina awm reng chinfelna awm chhung chu Gaza-a chengte hmun danga an pem a ni tiin a lo sawi tawh bawk.
Mahse israeli sorkar official thuchhuak chuan Gazans te chu an chenna inah an let leh thei ang a ti a, mahse, eng hunah nge an let leh a phal dawn emaw sawi lan a nei lo thung.
Hetih lai hian Gaza dinhmun chuan chhiat lam pan mek zelin health officials te chuan medical facility te damdawi in ngei pawh a him tawh lo an ti bawk a.
Israel-in chhuahsan tura thupek a chhuah hnuah international medical aid group pathum te chuan central Gaza a Al-Aqsa Hospital chu an chhuahsan dawn an ti bawk a.
United Nation’s Office for the Coordination of Humanitarian Affairs (OCHA) thupuangtu chuan Israel thupek chuan a tihbuai thu sawiin, “Damdawi in mi tam tak a dawl zawh bak awm tawhna chu tunah chuan critical reinforcement a hmu lo a nih phei chuan nunna chan an tam zual phah dawn a ni,” tiin Gemma Connell chuan a sawi.
Head of the World Health Organization, Tedros Adhanom Ghebreyesus chuan damlo 600 chuang leh health workers te chu damdawi in chhuahsan lo thei lova siamin an awm thu director in a hrilh thu a sawi a.
Antony Blinken-an Middle East a tlawhna chhan hi Gaza buaina chuan helai bial velah buaina nasa zawk a chawhchhuah hlauhna nasa tak a awm vang tia sawi a ni a.
Hamas top-official Saleh al-Arouri chu southern Beirut-ah a thuihruai mi parukte hamas military commander rual te nen tihhlumin an awm a, Israel tih ngeia ngaih a ni.
Iran thlawp Lebanon a thiltithei tak Hezbollah leader Hassan Nasrallah chuan Arouri thahna chu Israel thiltih tia sawiin hrem lohin an chhuak lovang a ti bawk a. Kar kalta Inrinni khan Hezbollah te chuan Arouri phuba lakna hmasa tia sawiin Israel chu rocket-in an kap nghal a ni.
“He lai region-ah boruak tang tak a awm mek a, he buaina hian hlet zau zawk a siam theiin tawrhna nasa zawk thlen thei a ni” tiin Blinken chuan a sawi.
Qatar PM Sheikh Mohammed bin Abdulrahman al-Thani chuan Arouri thahna chuan thil a tibuai zo vek tawh tiin a sawi bawk.
Blinken chuan Al Jazeera Gaza bureau chief fapa journalist Hamza al-Dahdouh Israel strike avanga nunna chu ‘vanduaina suangtuah phak loh’ tiin a sawi bawk a. He indonaah hian Palestinian pawisawi lo nunna chan an tam lutuk tawh a ni a ti bawk.
Blinken hian Qatar a tlawh hma in Jordan, Turkey leh Greece te a tlawh hmasa a, Pathianni tlai lam khan Abu Dhabi lutin Thawhtanni khan Saudi Arabia a pan leh a ni.
Hetih lai hian Israel chuan Gaza indona chu tawpsan a tum lo hle thung a. Kum thar thuchah Israel Defense Forces (IDF) tena an puanah pawh indona chuan hun rei tak awh theiin kum 2024 a tluan thei an la ti zawk a ni.
Israel-in a tum ber chu Hamas te nuaichimih vek niin Israel ram tana hlauhawm an nih tawh miah loh nana siam a tum bur a. Ruahmanna thuang li a siamin Israel chuan Gaza security chu a thunun tawh dawn an ti bawk a. Gaza dinthar lehna pawh kalpui a ni ang a ti bawk a, Palestinian te chuan Gaza chhunga inrelbawlnaah erawh thuneihna an nei ang, a ti thung.