Golden Globe-ah Billie EIlish-in record siam

Golden Globe-ah Billie EIlish-in record siam
Kumin Golden Globe Awards-ah hian record siam an awm a, Oppenheimer chuan award panga dawngin, kum sarih kalta a La La Land-in award pasarih a dawn hnua tum khata Golden Globe Awards dawng hnem leh ber a ni a, Barbie-in award pahnih- best original song leh cinematic & box office achievement category-ah a dawng a, Billie Eilish leh a unaupa Finneas ten record an siam bawk.
Barbie film hla Billie Eilish leh Finneas te kutchhuak ‘What Was I Made For?’ chuan best original song an dawng a, he category-ah hian kum thum liamta khan award an lo dawng tawh bawk a, he category-a award dawng nawn rang ber an la ni a, Billie Eilish hi hmeichhe zaithiam zinga he award dawng nawn thei palina niin, Carole Bayer Sager, Marilyn Bergman leh Diane Warren te hnung a zui ve ta a ni.
‘What Was I Made For?’ hi Barbie director Greta Gerwig phei chuan a film tana a laimu tiin a sawi hial a, Oscar-ah pawh best original song dawng tura rinkai a ni a, Oscar nomination hi January ni 23-ah an puang ang.
Ludwig Goransson chuan Oppenheimer avangin best original score a dawng a, Golden Globe Award a dawn vawi khatna niin, Swedish composer zinga he category-a award dawng thei hmasa ber a ni. Goransson hi Oscar-ah pawh best original score dawng thei tura rinkai a ni.