Fifa-in Overmars hremna pawtfan

Netherlands winger hlui Marc Overmars khan football a chawlhsan hnuah football administration lam luhchilhin, football a khelh laia a club hlui Ajax Amsterdam-a director of football hna a chelh laiin a thawhpui hmeichhe thenkhat hnenah message dukdak vak lo a thawn nual a, chuvang chuan nikum November thla khan Royal Netherlands Football Association (KNVB) hnuaia independent Dutch sports tribunal-in Dutch football-a kum hnih chhung eng nihna mah chelh thei lo turin an hrem a, kum khat erawh kaltlangpui loh turin an ti a; tunhnaiah Fifa chuan Overmars hremna hi Dutch football chhung mai ni lo khawvel huapa hremnain a pawhfansak ta a ni.
Arsenal leh Barcelona player hlui ni bawk Overmars hi tunah kum 50 mi ni ve tawhin, February 2022 khan Ajax-a a hna bansan daih tawh mah se nikum khan hremnain a tlakbuak zui ta tho a ni.
Fifa-in khawvel huap thlenga football kaihhnawiha nihna chelh thei lo tura hremna a tihpun lai hian Belgian club Royal Antwerp-ah technical director hna a chelh mek a, hei pawh hi a thawk chhunzawm thei rih dawn ta lo niin a lang.
Fifa thuchhuah chuan KNVB ngenna angin Fifa Disciplinary Committee chuan Marc Overmars laka hremna chu khawvel huapa kalpui a nih thu an tarlang.
Overmars hian kum 1992 leh 1997 chhung khan Ajax tan game 130 chuang khel tlingin, Arsenal lama a insawn hma thleng khan league title pathum, Dutch cup pakhat leh Champions League trophy pakhat bawk a lakpui hman a; Gunners a zawm hnuah title pahnih a la zui leh bawk.
A hnuah Barcelona zawmin, football khelh a chawlhsan hnuah Ajax director of football affairs hna kum 10 zet a thawk zui leh.
Kum 2022-a a message thawn a darh hnu khan Overmars hian a zah ngawih ngawih thu a lo sawichhuak tawh a; a nihna ang chelh chinte tih atana pawmzam rual loh a nih thu leh Ajax chhuahsan mai loh chu a tan duhthlan tur dang a awm loh thu a lo sawi tawh a ni.