Ram a that phahna turah tih hreh kan nei dawn lo – Home minister

Sawrkar chu khawng taka kal a tum a, ramin a that phahna tur a nih dawn chuan engmah tih hreh an nei dawn lo tih Home minister K Sapdanga chuan a sawi.
ZPM Aizawl Venglai Unit chuan an constituency huamchhung atanga MLA atana thlantlin pathum – K Sapdanga, Dr Vanlalthlana leh Lalnghinglova Hmar te chu Inrinni khan chawimawina hlanin MLA-a an tlin an lawmsak.
Minister K Sapdanga chuan ZPM chuan an party chhung bakah party-a nihna nei lo hnen atangin tawngtaipuina leh a sum leh paia puihna an dawng nasa a; an unit ten candidate-te ti hautak lo tura sum an tuak thawm angte kha Mizoramin inthlan a hmachhawn tawhah chuan thil thleng khat tak a ni tih a sawi.
“Kan ram rorelnaah Kristiante tih awm taka kan ngaih kan tih si loh tam tak a awmin kan hria a, tunah Pathian leh mipui zarah rorelna kan chang ta a, khawng taka kal kan tum a, kan kal zel dawn bawk. Kan ramin a that phahna tur a nih dawn phawt chuan tih hreh kan nei dawn lo,” a ti.
Minister Dr Vanlalthlana chuan sawrkar kan neih tawh ten theihtawp chhuahin ram an lo enkawl tawh a. Mipuiin beiseina neiin an thlang a, a taka chantir tur leh rorelna dik leh Pathian hre chunga ram hruai hna thawk turin mipuiin an beisei a. Sawrkar hotute pawh dik taka an kal theih nan tihbuai loha kan pawhpen loh a pawimawh dawn tih a sawi. “Kan zavaia kan thawhho a ngai a, huaisen taka kan kal a ngai. Ram inrelbawlnaah kalphung tha kan tuh theih chuan thangthar awm zel turah pawh hnuhma tha tak hnutchhiah theih kan inbeisei a ni,” a ti.
Minister Lalnghinglova Hmar chuan tun aia dinhmun tha zawka kan ram kan siam theih dan an lo ngaihtuah thinah theihtawp an chhuah dawn a, mipui pawhin tih tur kan nei, tiin, “Tih dik vek loh chang nei thei kan ni a, kan kalsual tur min venpuitu ni turin kan insawm a ni,” a ti.