British sipaia luh tumte kawm

Inspired Agency kaltlanga British Army nih tuma inbuatsaih leh dilna thehlut mek Mizo thalai rual chu chief minister Lalduhoma’n Inrinni khan a kawm.
British Army-a Mizo thalai an luh theih dan tur sawipui Deputy High Commissioner incharge of East India nen tunhnaia an inkawm chanchin chief minister hian a hrilh a. An thil kalpui dan chipchiara ziaka pe in, an harsatna sawipui leh a tum tur thu a sawi. Chutiang bawkin sawrkar atanga puihna an beisei pawh an lo zirchian hnuah sawiho pui leh an nih tur thu in a thlah a ni.
Thalai 43-in Commonwealth ram atanga British sipai luh theihna dan hmangin dilna an thehlut a. British sawrkarin dilna lehkha a kaltir dan a inan vek loh avangin an thlen chin an inchen vek lo tih an sawi. An zinga pakhat chuan kumin February 29-a assesment (medical, physical leh written test) nei turin engkim a paltlang tawh a, visa a hmu tawh a, kal turin a inpuahchah mek. Midang 10-in assesment neih hun an nghak a, midang dilna hi buaipui mek a ni. Dil thei hi pawl 12 pass, feet 5 tling chin an ni.