Sawilawk loin school tlawh

School Education minister Dr Vanlalthlana chuan Thawhlehni khan ‘surprise visit’ neiin Govt. Primary School-I Sairang a tlawh a, zirtirtute leh zirlaite a kawm.
Zirtirtu tho a nih angin zirtirtu hna chu mahni tana hlawkna awma ngaih loh pawhin, naupangin an hlawkpui a, an seilen zelnaah an hrereng a, chu chuan ram leh hnam tan pawh rah tha a chhuah thin, tiin Dr Vanlalthlana hian a sawi.
Sawrkarin zirna a ngaipawimawh dawn a; zirna kalphung tur an ruahman tawh tih sawiin, “Sawrkar hnathawk te, zirna lama tawnhriat ngah leh mi thahnemngaite thurawn bakah zirna kaihhnawiha mithiam zawkte zirchianna leh rawtna ngaihpawimawh a ni a. Thawklehkhata danglamna thlen chu a harin a that lohna zawk pawh a awm thin a, a tahtawla zirna kalphung siamthat kan tum a ni,” a ti.
Sawrkarin zirna siamthat tuma tan a laknaah zirtirtu, nu leh pa leh khawtlang pawh chumi tichak tura tan tlan a tul tih a sawi a ni.
Zirna chu mi puitling ni tura min chhertu pawimawh a nih avangin eng eizawnna kawng pawh zawh dawn ila, zirna hmanga inchher phawt chu a hriam bik tiin thahnemngai taka lehkha zir turin zirlaite a fuih a ni.
School Education minister hi secretary Dr Lalzirmawia Chhangte leh director Lalsangliana ten an tawiawm a ni.