China leh Pakistan ramri hung a tul zawk – K Vanlalvena

India-in ramri hung a duh a nih chuan Myanmar Chin state leh Mizoram inkar hung loin, China leh Pakistan ramri hi hung zawk rawh se, tiin Rajya Sabha MP K Vanlalvena chuan Mizoram hnaih lama ramri hung tum a dodal tlat thu a sawi.
Mizo Zirlai Pawl chuan ram leh hnam tana a thawh that avangin Rajya Sabha MP K Vanlalvena hnenah hian Thawhlehni lawmthu sawina a buatsaih a. MP chuan Mizoram leh Chin State Zofate zalen taka inkalpawhna, Free Movement Regime (FMR) hlih tumna awm chu a pawm lo tih sawiin, Parliament session-ah sawichhuah ngei a tum tih a sawi.
“British-in Zofate min thendarh a, a pawi kan tih em em laiin tunhnaiah kan inkalpawhna ber chu hung tum a ni leh a. India hian ramri hung a duh a nih chuan Mizoram leh Chin State inkar niloin, China leh Pakistan ramri hung mai rawh se,” a ti.
Rajya Sabha MP hi Mizo hnam chhan nana Parliament-ah vawi duailo auchhuak a, ram leh hnam tana theihtawp chhuaha hma a lo lak tawhna avangin MZP hian lawmthu sawina thuziak leh Tawlhloh puan an hlan a. Network for Unity Association Mizoram leh Mizoram- Myanmar Coordination Committee-in chawimawina thilpek an hlan bawk.