Ram mandir hawn thu hriatpui lo

Ayodhya-a Ram mandir sak chungchang hi
hun engemaw chen chu India ram politics titi a tling tawh a, inhnialna pawh a chawk chhuak nasa. Thawhtanni khan India ram prime minister-in a hawng a, a hawn dawn atangin titi a siam hle. Mizoram BJP chuan Ram mandir hawn chungchangah hriat an nei lo a, engmah an hriatpui lo niin an sawi.
“Hei hi chu Hindu sakhaw thil a ni a, keini party-in engmah hriat kan nei lo a, kan hriatpui lo,” Mizoram BJP president Vanlalhmuaka chuan a ti.
Mizoramah an party-in Ram mandir hawn chungchangah engmah an ti lo tih a sawi a, Delhi-a an party hruaitute’n hun lo hmang turin an ti hek lo tih a sawi bawk.
Ram mandir hawn chungchangah hian India sorkarin theihtawp a chhuah tiin a sawi theih a, a hawn ni pawh hian sorkar laipui hnuaia thawkte tan chawlh an puang. Mizoramah pawh an chawl a, central university Mizoram University pawhin chawlh a puang.
Hemi chungchang hi sawiin Mizoram BJP president chuan, India ram hmun hrang hrangah Ram mandir hawnnaa tel duh an awm a, a hmuna kal thei lote pawhin TV leh youtube lama lo en an duh a, chuvangin sorkarin chawlh a puangah an ngai tih a sawi.
“He thil hi India sorkar hmalakna a ni a, party-ah hma lo la tura hriattirna engmah kan dawng lo a. Tel ve tur emaw lo en tur emaw pawhin min hriatpui lo a, kan party-in engmah information dawn kan nei lo,” a ti.
“He thil hi party thil a ni lo a, party tih a ni lo a, sorkar tih a ni,” a ti a, Delhi-a an hruaitute hnen atangin hemi chungchangah hriattirna emaw tel tura sawmna emaw an dawng lo tih a sawi.