North Korea leh Russia thawk dun zel

North Korea chuan Russia nen startegic leh tactical cooperation neih remti dunin ‘new multi-polarized international order’ din an remti dun tiin a sawi a. Ram aphnih te chuan United States nena inkar chhe zelah nasa zawka thawhho an tum a ni.
North Korean Foreign Minister Choe Son Hui leh Russian President Vladimir Putin leh Foreign Minister Sergey Lavrov tena karkaltaa inhmuhna an neih chungchangah North Foreign Ministry chuan Putin chuan Pyongyang tlawh a remtih thu leh a rang thei ang bera tlawh a tum thu a sawi zui bawk.
North Korea chuan Russia nena an inzawmna tinghet zelin nikum September thla khan an leader Kim Jong Un chuan Putin hmuin Moscow a lo tlawh tawh bawk a. Kim chuan Washington, Seoul leh Tokyo te nena an inkar chhe zual zelah leh diplomatic lama ensan a nih kal zelah Russia nena inzawmna nghet zawk a zawng a ni.
Hei bakah hian North Foreign Ministry chuan karkaltaa ballistic missile a test avanga UN Security Council emergency meeting koh chu sawisel bawkin, North Korea chuan an missile test chu intermediate-range solid-fuel missile a nih thu leh mahni invenna tur a ni tiin a sawi bawk.
South Korea chuan kar kalta Ningani khan UN Security Council chu North Korea-in missile test a neih zur zutah ngawih a chuh tlat chu a sawisel a. Permanent member pahnih Russia leh China te chuan US in weapon test avanga na zawka North Korea hrek rawtna a neihte chu an dang chat tlat a, hei hi Ukraine indona kaihhnawiha ngaihdan inang lo kal zelin a hrin a ni.
Pyongyang leh Moscow inzawmna tha hian arms cooperation lam a hawi tiin khawvel ram dangte ngaih a tha lo hle bawk a, North chu Ukraine indonaa Russia hnena ralthuam peah puh a ni a, Russia chuan North chu economic aid a pe ve thung tia sawi a ni a. Heng puhnate hi Pyongyang leh Moscow-te chuan an hnawl ve ve thung.
North Korea Foreign Ministry chuan thuchhuah an siamah Schoe leh Russian officials te chuan ram pahnih te ngaih pawimawh humhim nan leh multi-polarized international order thar siam nan nasa zawka thawh dun an rem ti a ni tiin a sawi.
Russia pawhin Ukraine indona kal mekah Russia a thlawp avanga lawm thu a sawi bawk a. Choe leh Russian officials te chuan United States in a Assian allies te kaltlanga military cooperation a ti nasa zual zel chu ngaihmawhawm ti bawkin chu chuan North Korea sovereignty leh security interest a khawih a ni, an ti bawk.
Russia-in Ukraine a run chu remchanga hmanga Kim-an tun hnaia weapon test nasa zawka a kalpui avangin Korean Peninsula-ah boruak a tang hle a. United States, South Korea leh Japan te chuan hei hi chhang letin military exercise nasa zawkin an nei bawk a. Chu tak chu Kim chuan North do tumna atana inpuahchahna tiin a haw em em thung a ni.
Ram pathumte sipai nunchan zir a duh lohzia lantir nan kar kalta Zirtawpni khan North Korea chuan nuclear-capable under attack drone a enchhin leh ngat bawk a ni.
Kar kalta vek khan Pyongyang parliament chuan Kim Jong-un an a hma lawka South Korea nena peaceful reunification a awm theih nana hmalakna tin te chu a bansan thu a sawi leh North constitution chu ziah thata South Korea chu hmelma ber tia dah tur a tih chu an pawmpui bawk a ni.