India football harsatna bul ber chu striker

Thawhlehni khanan group match hnu-hnungberah sikhat faia Syria hneh lo lehin India mipa football team chuan an khelh zawng zawnga tlawm vek chungin Asia khawmualpui huap football inelna lian ber Qatar-a khelh mek AFC Asian Cup 2023 an mang-tha a; head coach Igor Stimac chuan a team chetchhiat chhanah goal khungtu tha an nei lo chu chhuanlam pui berah a hmang.
Tlang hriat angin, Indian team hian striker rinrawl Sunil Chhetri bak goal khungtu rintlak, quality striker han tih ang kha a kawl lo rei ta viau a; India captain-te pawh han ni ve zuai Jeje Lalpekhlua awm lai khan Delhi tlangval Chhetri han chhawk thei hnaivai deuhber kha a ni a, tunah erawh chawlh hnaih ve tawh Chhetri bak tlar hma lama goal zawng tak tak tura rin ngam tur striker India hian a tlachham rei ta viau niin a lang a, Stimac-a innghahna lian ber pawh chu kum 39 laia upa ni tawhin, forward atan chuan a upa deuh lam a ni tawh!
India boss Stimac chuan a team-in goal bula inringtawk thei tur player a mamawh tih a sawichhuak pawh hi a awm viauin a lang.
Syria laka an tlawm hnu khan India manager chuan post-match conference-ah a team harsatna tawh mek chungchang chu zep buangbar duh loin a sawichhuak a, “Goal reng reng hi team chhunga goal thuntu tha tak, goal hmaa inringtawk tlat mite hlawhchhuah a ni thin a; tun game-ah khan kan duhtawk goal khung thei turin chance kan hmu a, in zavaiin international kawtkaia goal thun kan harsat tlat chhan hi in hre vek e.
“Club level-ah pawh bul kan han tan leh mah ang a, centre forward position bawk hi Indian player-te harsatna tawh tur a ni leh ang. Club lama kan ziaawm hunah chauh national team chuan goal khung thei tam zawk a nei thei dawn a, chuvangin, he hmunah chauh hian chu chu vei loin hmun dang pawh kangkai teh se,” a ti.
Foreign coach hian Indian Super League club-te’n centre forward position-a tualchhung player-te hnawla ramdang player chahluh an chhawr nasa chu national team-in an tuar tih a sawina a ni.
Asian Cup-ah khan an group match khelh pathumah India tlawm fai vekin, goal ruk an chhuah tling a, he tournament an hmachhawn tawh vawingaa an chetchhiat ber tum la niin, a tir berah sihnih faiin team lian Australia an hneh lo a, chak lo nghal mah se an khelh danah India team-in fak an hlawh viau a; a dawtah sithum faia Uzbekistan ngam lo lehin, Syria laka sikhat faia an tlawm tum pawhin goal an khung zo leh lo a, tournament chhungin goal khat mah India khan lawm tur a nei lo!
Tun kha tournament pakhata goal khung miah loa India tlak vawikhatna niin, India lone ranger ni rei tawh tak Chhetri meuh pawh forward satliah ang maiin a inlan tluanchhuak!
Fooballer la inkhel mek zinga international goal khung tam pathumna ni thei Chhetri tan tun kha Asian Cup a khelh tawpna a nih tawh hmel a; kum 2011 leh 2019 khan India chu knock-out round luhpui pha chuang lo mah se goal hnih ve ve khungin tournament a khar thei.
Stimac chuan an tan tawnhriat leh zirlai duhawm tak a nih thu sawi chungin mite’n Indian football harsatna tawh mek an hmuh ve vek thu a sawichhuak a, pre-tournament training camp atana chawlhkar li tal a phut laiin ni 10 chiah inbuatsaihna hun siamsak a ni kha India tlawm chian hle chhanah a puh lo thei lo.
India coach hian hun rei lote chhunga Indian football hlawhtlinna chanpui duak duak thei tura magic thiam thil a kawl bik lo tih sawi chungin, “India hi U-23 AFC Asian Cup khel turin a la qualify ngai lo a, chuti chung chuan eng aiah tehlul nge senior player tha tak tak an lo chhuah theih ang? U-18, U-20 leh U-23 Asian Cup khel eih lo chunga senior level-a result duhawm beisei thu va awm uk suh.
“Magician ka ni lo a, lo dawh hram hram tura ngentu pa thawkrim ve tak satliah mai chauh ka ni. Football-a thil tha kan hmuhte hi zankhat thil thua lo thleng mai a ni lo.
“Tun thla 12 lo herchhuak leh tur chhung hian World Cup Qualifiers third round erawh ka tiam che u a; investment tam zawk nena tan kan lak vat vat a ngai a, Indian football academy-te enkawl turin foreign coach rual kan chawkluh a ngai bawk,” tiin senior level-a Indian football hmasawnna tur damdawi a chawh tel.
Stimac hian an ngam loh hnuhnungber Syria leh a team enkawl India inthlauhna a tarlang tel zeuh bawk.
Syria chakna goal awmchhun khungtu Omar Khrbin-a hlut zawng (market value) kha euro maktaduai 4.5 niin, kha match-a Mizo player pahnih Lallianzuala Chhangte leh Lalengmawia Ralte telna India starting line up hlut zawng belhkhawm kha euro maktaduai 2.5 a ni ve thung a; 2017 AFC Asian Footballer of the Year leh UAE Pro League lama khel mek ni bawk Khrbin ringawt pawh kha India team pumpui tan chai tham hle a lo nih chu!