LVMH chief Bernard Arnault hausa ber

Bernard Arnault, Chairman and CEO of Moet Hennessy Louis Vuitton (LVMH) chuan Elon Musk lehpelhin khawvela mi hausa ber a ni ta tiin Forbes-te chuan an sawi a. French billionaire leh a family te hausakna chu $23.6 billion a pungin $207.6 billion vel nia chhutsak a ni.
Karkalta Zirtawp khan Arnault hausakna chuan Tesla CEO hausakna $204.7 billion chu a khum tiin an sawi a, Musk chuan $18 billion chuangin a hausakna 13 per cent in a loh tiin Forbes chuan a sawi bawk.
Billionaire pahnihte hi hausakna tug-of-war ah kum 2022 atang khan an inpawt tan tawh a, kha mi kum tawp lamah khan Arnault chu khawvela mi hausa ber a ni hman a ni.
Forbes-te chuan luxury goods Dior, Bulgaria leh Sephora te inthlunkhawmna LMVH market cap ringawt chu $388.8 billion an ti a, tesla market cap erawh sang zawkin $586.14 billion a chhutsak an ni.
Forbes te chhut dan chuan hausa ber chu Bernard Arnault & Family ($207.6 billion), Elon Musk ($204.7 billion), Jeff Bezos ($181.3 billion), Larry Ellison ($142.2 billion), Mark Zuckerberg ($139.1 billion), Warren Buffett ($127.2 billion), Larry Page ($127.1 billion), Bill Gates ($122.9 billion), Sergey Brin ($121.7 billion), Steve Ballmer ($118.8 billion) te an ni.
Mahse, Bloomberg Billionaires Index thung chuan Musk chu khawvela mihausa ber la ti thungin a net worth chu $199 billion-ah a chhutsak thung a. Pahnihnaah e-commerce giant Amazon Jeff Bezos chu $184 billion nei tiin pahnihna a ni a. Pathumna Bernaud Arnault chuan $183 billion a ni thung.
Nikum April thla khan Bernard Arnault hausakna chuan $200 billion pelin he mellung phun thei pathumna chauh niin a hmain Elon Musk leh Jeff Bezos te chuan an lo thleng tawh thung a ni.
Luxury goods demand sang zelah Arnault hausakna chu kum 2023 khan $39 billion-in a pung a, chu chu LVMH share 30 percent laia a san chhoh vang a ni.