Chite-a sawrkar hmunhma en

Sports & Youth Services minister Lalnghinglova Hmar chuan Nilaini zing khan Chite Veng Sports Complex a tlawh a. Aizawl East-II bialtu MLA, minister B Lalchhanzova, AMC Ward.VIII corporator Christina Roluahpuii Sailo leh khawtlang hruaitute, Chite Veng Primary School zirtirtute leh kohhran hruaituten lo dawngsawngin, contractor-te nen hma lak mek leh hma lak zel dan tur an sawiho.
Chite Veng Urban Primary School kalpui dan tur en ho nghal a ni a. Tuna Chite Veng UPS-in an luah mek building hi vantlang rama awm niin, Health & Wellness Centre sakna hmun atana ruahman a nih tak avangin thiah a tul dawn a ni. A bul maiah school ram hmun awl a awm a, school building thar sakna tur hi PMJVK project hnuaia dil niin, school thar sak zawh hma chu school luh nan sports building hi hman lailawk a tul dawn a, Sports department building, Chite Veng rama sak chu school atana luah hawh an mamawh thu Sport minister hi an lo sawipui a, dilna thehluh phawt nise, an ti. Sport minister hian tih hlawhtlin dan kawng a lo zawnpui tur thu a sawi a ni.