Ramri velah la inkalpawh reng

India leh Myanmar hi ramri atanga km 16 chinah passport leh visa tel lovin a inkalpawh theih a, heng lai vela cheng Zo hnahthlakte chu an inkalpawh mai a ni lo, chhungkhat laina ang mai an ni thin. Hei hi India sorkarin tihtawp a tum mek a, mahse vawiin thlengin Zo hnahthlakte an la inkalpawh reng tih thu dawn a ni.
Km 16 chin inkalpawh phalna (free movement regime) tihtawp tumna hi a taka thawh chu a la awm lo a, ramri vela chengte pawh an la inkalpawh reng.
Myanmar lam hi an buai a, mahse tun hnai teah hi chuan Champhai district dep Myanmar lam hi an buai a zia deuh. Mizoram lam leh Myanmar lama mite’n passport tel lovin |iau an kan a, an intlawhpawh reng. Mahse a hma ang kha chuan mi an thahnem lo tih thu dawn a ni.
Zokhawthar atanga thu dawn danin, Myanmar lam atang hian Zokhawthar-ah ni khatah mi 100 chuang an lut thin a, mi 170 vel tlin chang te, 200 tlin chang te pawh an nei.
Myanmar atanga Zokhawthara lutah hian a tam ber chu zirlai an ni teh tlat! Myanmar hi an buai avangin sikul pawh an kal mumal thei lo a, raltlan ni lo, Myanmar-a mahni khua atanga Mizorama sikul kal an awm nual. Chung mite chu ni tinin sikul kal turin Mizoramah an lut a ni.
|iau kam vela mite hi inhre tha an ni a, chhungkhat te pawh an ni fur. Chhiatni thatni pawha inkalpawh an ni a, sumdawnna thil avang te, chhungkaw thil avangtea |iau kan ngai an awm ve deuh reng tih thu dawn a ni.
Mizoram lam atang pawhin Myanmar-a lut an awm ve deuh reng a, sumdawnna avanga Myanmar hi kal an ni tlangpui nia sawi a ni.
Myanmar an buai avangin sumdawnna hi a kal mumal lo a, Mizoram bungrua tur pawh Myanmar-ah hian a tang nasa. Bungruaah hian tlang tawk a awm thin a, a bikin thei a tlang a, chumi buaipuia inkalpawh chu an awm thin tih thu dawn a ni.
Mizoram atang hian Rihdil-a kal pawh an awm zeuh zeuh a, a hma angin thahnem lo mah se Rihdil-a kal hi an awm ve deuh reng nia sawi a ni. Zokhawthar kaltlang kher lovin kawng dang atanga kal hi a tam zawk chu an ni ang, thudawnna pakhat chuan a ti.