INTERIM BUDGET 2024 SPEECH (A ngaihnawm zawng ve thungin le)

Huna Kawlvawm

February 02, 2024 :
Nirmala Sitharaman, Union Finance Minister hian Interim Budget 2024 thu hma leh khaikhawmna sawina atan minute 56 a hmang. Hei hi Sitharaman-i budget speech tawi ber tum a ni. Kum 2020 khan Budget speech rei ber a lo siam tawh a, darkar 2 leh minute 40 thu sawina atan a hmang a ni.
India ram hmun tin – khawpui leh thingtlangah pawh Union Budget pharh a nih hi chuan Television-a chik taka thlir duh an awm thin a, budget pharh ni hi chuan rickshaw hman mai tur pawh vang rawih khawpin TV lamah an lo thlir thin.
Finance Minister
Nirmala Sitharaman hian February 1, 2024 a Budget a pharh hi Budget kum 6 chhung a zawna budget a pharhna a ni. Manmohan Singh Budget pharh zat a rawn nihrual ta chiah a ni.
Finance Minister hi tu pawh ni se, Budget an pharh dawn tum chuan amah deuh chiah Parliament House chhung leh pawn lama Television kal tlangin mihring tam takin an thlir thin avangin uluk theihtawpin an inchei ngei thin.
Sitharaman-i hian kawr eng dal, a ban a pawl dala tial (turquoise-coloured) a rawn ha a, Kantha silk saree rawng paw-dal phiar par (embroidered) a rawn bat a, a sam tuak pawh nikuma budget a pharh tum ai chuan a tuak a lo tam ta hle tih a hriat a, a hmel pawh a lang tar deuh sawtin a lang. Kum 64 ( August 18, 1959) lai a lo ni tawh reng a.
Smitharaman-i budget thu hma (Budget speech) sawi lai hian ro relna changtu (treasury benches) lama thu MP te chuan, “July thlaa full budget kan Sorkar-in kan pharh leh hunah,” a tih chu lawmin an thum ham ham a.
Hetih mek lai hian opposition MP te chuan FM Sitharaman-i thu sawi chu lak kawih tur leh sawisel nghal tur a awm em ti chungin ngun takin an lo ngaithla ve thung a. A thu sawi kal lai thenkhat pawh an au bahlah deuh chang a awm a, Lok Sabha inthlan zawh hnuah thu neihna changin July thlaah kan Sorkar bawkin Budget 2024-25 pum chu kan pharh leh ang a tih chuan Opposition MP te thin a khei zual hle a ni.
A hma lamah kir leh zawk teh ang. Session tan hma hian BJP MP te chuan an auhla pangngai bawk – Bharat Mata ki Jai, Jai Shri Ram tiin an au rual thup thup a. Hemi hnu rei vak lo, chawhma dar 11:00 rik hma hretah Prime Minister Narendra Modi chu Lok Sabha chamber-ah a rawn lut a ni.
Kum 10 chhung hian India ram sum leh pai dinhmun chu nasa taka chawi kanin leh hma lam pan tura siamthatin a awm tih Nirmala Sitharaman chuan a ti.
Kum 2019 khan India rama hmeichhe full-time Finance Minister hmasa ber, Nirmala Sitharaman chuan budget sawina atan hian darkar 2 leh minute 17 a hmang a. Kum 2021 khan darkar 2 leh minute 50 a hmang a, kum 2022 ah minute 92 a hmang a, 2023 ah minute 87 a hmang bawk.
Nikum 2023 Budget Speech-ah khan Ms. Sitharaman hian Tamil hla chham chi (poets) a rawn chham tel ang kha tun tumah chuan a rawn chham tel ta lo, Prime Minister Modi hming erawh vawi 8 lai a sawi thung.
Lok Sabha-a Budget pharh lai mipui vantlang thlirna (public galleries) erawh a thawl hle. Gallery 2 lamah Rajya Sabha members te an thu thung. (Union Budget hi Lok Sabha-ah pharh tur a ni tih High School Civics-a kan zir kha ka hre chhuak thar leh e). Finance Minister Sitharaman-i Budget speech hi a laichin— Krishnamurthy Lakshminarayan, Vidya Lakshminarayan bakah a fanu Vangmayi Parakala pawh Gallery 3 lamah rawn tawiawmin an thu bawk.
Thil man sang leh a hlutna tla hniam (inflation) pawh harsatna siam tham a awm loh thu Sitharaman-i hian a sawi.
Tun tum budget speech-ah hian Ms. Sitharaman tawng lam pum thar a rawn chher chhuak a, FDI – First, Develop India tihna atan leh GDP–Governance, Development Performance tih thu hi a ni (Hei hi a lam pum tak tak erawh a ni lo). Chhuan thar (next generation) lo awm tur te hma khaw ngai takin ram sum leh pai dinhmun kan siam tha a, chumi mil tur chuan kan her dik a, kan thantir a ni, tih thu Sitharaman-i chuan a sawi.
“Gross Domestic Product (GDP) chak taka a than mek rual hian Sorkar hian a ngaih pawimawh leh na taka a nawr chu huapzo, inawpna tha leh hmasawnna ‘GDP’, i.e., ‘Governance, Development and Performance’,” tih Ms. Sitharaman hian a sawi.
Kum 2019 atang khan Finance Minister Sitharaman Parliament-a Budget bu ken luhna atan briefcase hman thin chu hmang loin file kawm sen ‘bahi-khata’ an tih national emblem chuang hmangin Budget documents – tablet computer chu a rawn hmang ta a ni.
Indona avangin khawvel dinhmun hi a harsa affairs becoming more complex, challenging with wars: Finance Minister in Budget Speech
Tun hnai maia NDA zawm thar, JD(U) hruaitu Rajiv Ranjan ‘Lalan’ Singh chu Finance Minister budget speech pawmpui zawnga a khawsak dan chuan TV cameraman ten an hmuh hmaih lo, a hmel kan lo hmu ve chhen e.
Minute 56 chhung Finance Minister Nirmala Sitharaman thu sawi zawh hian Prime Minister Narendra Modi chuan Ms. Sitharaman chu pan hnaiin lawmpuina thu kam hnih khat a va hrilh a, Minister tam takin lawmpuina thu an hrilh bawk.
Interim Budget 2024 hi tlem chu i han hrut lawk teh ang aw.
Total Receipts other than borrowing Rs. 30.80 lakh crore
Total Expenditure Rs. 47.66 lakh crore
Tax Receipts Rs. 26.02 lakh crore
Fiscal deficit in 2024-25 to be 5.1% of GDP
FY2025 market borrowing seen at Rs 14.13 lakh crore
11% increased in Capex to around Rs 11.1 lakh crore, it will be 3.4% of GDP (up from 3.3%).
( A rem leh Interim Budget 2024-25 hi kan la luhkhung leh ang chu).
Source :
Live TV coverage
India Budget
(indiabudget.gov.in)