Ke pahnih bul leh kut zungtang pathum chauh nei chunga Mt. Everest lawn chhuak thei

Andrea Lanfri chu 2015 khan thla sarih chhung zet damdawi inah a awm a, chutih lai chuan kum 29 mi a ni. A thla sarih damdawi in awm chhunga thla hnih chu nikhawhrelovin a awm nghe nghe a ni. A natna hi fulminant meningitis leh meningococcal sepsis a ni. A infection a nasat em avangin doctor ten a ke ding leh veilam chu a khup hnuaiah an tan sak ta ve ve a, a kut zungtang pasarih an tan sak bawk.
Hetiang dinhmuna a ding chung hian Andrea chu nun beidawnna tih velin a tibuai ve chuang lo, ke pahnih nei lo a ni chungin intlansiaknaa tel ve a duh tlat a, Iatlian national athletics team a zawm a, European leh World Para Athletic Champonships-ah 2016-18 khan silver leh bronze medal te a lo dawng tawh a ni.
Chuta tang chuan Andrea hi tlang lawn lamah a tui leh ta a, tunah chuan ke bul chung leh kut zungtang pathum chauh nei chunga khawvela tlang sang ber Mount Everest lawn chhuak thei hmasa ber a ni ta a ni. Ke bul chunga Everest lawn chhuak hi an lo awm zauh zauh tawh a, ke pahnih bul chunga lawn chhuak hmasa ber chu Mark Inglis, New Zealand mi niin, Gary Guller, USA, chu ban pakhat chauh nei chunga Everest lawn chhuak hmasa ber a ni bawk. Mahse, Andrea hi chu ke pahnih tan leh kut zungtan tan (multiple amputee) ni chunga Everest lawn chhuak thei hmasa ber a ni ta a ni.
Andrea chuan, “Damdawi ina ka awm lai khan, tlang sang lawn chhuah khirh ber ka lawn chhuak tawh a, tunhmaa ka tih thin te ka la tih leh theih ngei ka inbeisei tlat a ni. Tlang lawn te hi ka damloh hma atanga nuam ka lo tih tawh a ni a, tunah chuan ka damna chhan pakhat a ni ta zawk,” a ti.
Andrea hi a thian, Luca nen Everest expedition hian an thawk chhuak a, a tlang bul thutah a boruak te ngaia nei thei deuh turin an han inkulh ren rawn a, chumi hnuah an lawn tan ta a ni. Kut zungtang pathum chauh nei chunga ke lem vuah chung nena tlang lawn chu thil harsa tak mai a ni ngei ang. Andrea chuan, “Thil tih awlsam dan thar ka hmuchhuak pawh a ni chuang lo, tun hmaa ka tih dan ni loa thil tih thiam dan ka zir mai a ni. Ka mamawh dan anga chet theih dan ka thiam a ngai a,” a ti.
Andrea leh Luca te hian Everest hi thla hnih leh a chanve chhungin an lawn chhuak a, an tum lawk dan aia kar hnihin an lawn chhuak rang ta zawk a ni. Andrea chuan, “A tlang chhip ka han hmu chu rilru a khawih duh ve khawp mai. Midangte hlim dan nen chuan a inang lo deuh mai thei. Hun kaltawh ka ngaihtuah kir a, ka training lai te, Everest lawn chhuak tura ka beihnaa tlang dang ka lawn chhuah tawh te ka ngaihtuah kual a. Lawm avangin hnuk a ulh duh khawp mai,” a ti.