Spain ramah Dani Alves-a rape case ngaihtuah mek

Spain ramah Dani Alves-a
rape case ngaihtuah mek
Brazil footballer hlui Dani Alves-a pawngsual thubuai awrh mek chu tunkar Thawh-tanni atang khan Spain ramah ngaihtuah tan a ni a, vawiin thleng a awh ang.
Kum 2022 December thlaa hmeichhe pakhatin nightclub chhunga pawngsuala a puh hnuah Barcelona player hlui hi bail theih loha man niin, kum khat chuang lung inah a tang tawh a, he case-ah hian thiam a chang zo lo a nih chuan kum 40 mi hian kum li atanga kum 15 thleng jail a tang thei ang.
A tirah Alves hian pawng-suala puhtu nen chuan an inhmu lo hrim hrim niin a pha zet a, a hnuah an pahnih remtih dunna thlapa sex hmang an nih thu a sawi leh a, vawiin hian a rape case trial a tawp dawn a; trial chhung hian amah Alves leh a nupui hlui (a pasal hmingchhiat hnua inthenna tifel ta) telin court-ah hian mi 30 chuang an inlan dawn a ni.
Brazilian hian trial hmachhawn tura inbuatsaihna hun thawl zawk a duh avangin tuntuma a chungchang ngaihtuahna hun hi la thleng ri lo se tiin court-ah ngenna a thlen zet a, mahse, Thawhtanni khan Barcelona court chuan hnawlsakin, trial case an kalpui ta tho a ni.
Trial ni hmasaberah khan pawngsuala puhtu hmeichhia pawh court-ah hian inlanin, rorelna hmuna evidence petu zingah a tel a, midangte hi chu an hmel hmuh thei hloh tur leh tunge an nih hriat theih loh turin puanzar phen atanga an thil hriatte sawitir an ni.
Pawngsuala puhtu hian Barcelona khaw nightclub VIP bathroom-ah Alves chuan a thlemlut nia sawiin, tah chuan sex hmanpui turin a nawrlui ta niin a sawi.
Pawngsual thlen zan nia a sawiah khan a puhtu cousin leh thian pakhat pawh kha nightclub-ah khan an awm ve a, anni pawh khan Thawhtannia trial tan ni khan court hnenah an thil hriatte an sawi ve bawk a; anni pawh hian khami zan tir lam khan Alves lak atang thoin hur sualna lam hawia thlemna leh sawmna an dawn ve tho thu an sawi.
An sawi zel danin, pawngsuala puhtu chuan a tirah Alves laka a thiltawnte chu an hnenah pawh a zep a, a chhan pawh an awihsak loh mai a hlauh vang niin an sawi.
Sevilla leh Juventus player hlui Alves tantir tumtu ukil-te chuan kum kaw tang turin court-ah hian an bei mek a, hmeichhe laka zangnadawmna atan euro 150,000 (£128,000) chawi turin court-ah an bei bawk.
Thawhtannia trial tan a nih lai khan a fapa leh a nu Lucia Alves leh a fapa pawh court-ah inlan vein, Lucia Alves hian trial hma khan social media lamah a fapa puhtu hming a tarchhuak a, chu chu court lam phal loh a nih avangin court hremna hi hmachhawn ve thei dinhmunah a din phah a ni.
Tarlan tawh thin angin, nikum August thla khan Alves hi dan angin court-ah thubuai siamsak a ni a, a hnuah court chuan Barca defender hlui an puhna evidence chu thu tlingah ngaiin trial neih hun tur a tichiang zui ta a ni.
Paris Saint Germain player hlui Alves hi a vanduai kan ti dawn nge, Brazilian dang Neymer-te ngei ngei pawh an football khelhna ramah pawngsuala puh an ni ve tho a, mahse, an ram lama an luh hman avangin lung in tang lo zawngin an khawsa a; Alves pawh hian an man hnu khan bail-a chhuah a dil ngei a, mahse, an ram lam pana a thlawhchhuah palh hlauhna avangin tun thleng hian bail phalsak a la ni lo.
|um hnih zawma Barcelona a zawm chhung khan game 400 chuang khel hmanin, Catalan team chu league title paruk leh Champions Leagues trophy pathum a lakpui hman a; Brazil 2022 World Cup squad-ah a tel bawk.
A club hnuhnung ber Mexican team Pumas UNAM chuan nikum January thla khan Brazilian contract chu intiamkamna engmah awm loin an titawp fel tawh a ni.