Hlawhtlinpui ngei turte chauh…

Chief minister chuan thlai tharchhuah lam, thil siamchhuah leh service tha siam theite tanpui turin ‘Hand Holding Policy’ an kalpui dawn a, hlawhtling lo tur chiang sa, ruling party nih vanga duhsak ngawt an tum lo a, duhsak bik nei loin hlawhtlinpui ngei tur chauh an thlang dawn, tih a sawi a.
‘Hand holding policy’ tih hi a hming atang chuan thil tha tak tur niin a ngaih theih. A lehlamah chuan, he policy kalpuitu sawrkar hian ‘hlawhtlinpui ngei tur chauh’ tanpui a tum a nih chuan, hlawhtlinpui ngei tur tih hriat chian sate chu tanpui an ngai lo zawk dawn lo’m ni? Eng tin nge ‘hlawhtlinpui tur’ chin thliar an nih dawn? tih hi zawhna awm thei a ni.
Bul tanna neih loh avanga hma la thei lo, mahse bul tan chak ve em em si thahnem tak an awmin a rinawm a, chungte chu dawmkan ngai ngawih ngawih zawk an ni. An hlawhtlinpui theihna tura an bana kaih ngai em emte hi ‘Bana Kaih Policy’ thil tum chu a ni ber dawn lo’m ni? ‘Hlawhtling lo tur chiang sa’ hi chu an awm tehmeuh ang; mahse, hlawhtlin tum, kal ngaihna hre lo tam tak an awm teuh dawn; chung mite dawmkan chu sawrkar tihtur chu niawm tak a ni.
Hetianga tum bik neia kal hi, tum mumal nei lova phek en tawp ai chuan a tha hrim hrim a. Mizoramah hian thalai lehkhathiam hnathawh tur nei lo hi an pung thur thur a, khawvel a awm chhung chuan zirna hi a tawp mai dawn lova, kum tin thalai lehkhathiam hna nei lo hi an pun belh zel dawn. Tuna kan khawpui traffic tawt telh telh ang deuh hi kan ni mai ang tih a hlauhawm hle. |halai kal ngaihna hre loten traffic an tih jam nasat hmaa an bana kaih kal zung zung hi a pawimawh dawn hle.
|halaite pawh hian sawrkara innghat mai lova, tihtur an ngaihtuah chhuah thiam a pawimawh a, ram leh hnam tana phurrit ni lova, ram leh hnam phurrit chhawk zangkhai zawk tura rilru an put a ngai a, chu chu ‘nationalism’ kan tih fo hi a ni.