Mi hmantlak zawk kiana chawlh ve ka duh tawh – Vanlalzawma

MNF vice president Vanlalzawma chuan party-a mi hmantlak zawkte kianin chawlh ve a duh tawh tih a sawi.
Zirtawpnia MNF office – Mizo Hnam Runa inkhawmah Vanlalzawma chuan party inrelbawlna fel tawk loah mawhphurtu a ni tih a sawi a. Party inrelbawlnaah party worker-te duh angin thil kal lo tam tak a awm tih sawiin, “Heng zawng zawng hi ka mawh a ni,” a ti. MNF-a a awm vanga a nih phak loh tur an nih dan leh dinhmun sang tak tak a chan thu sawiin, “MP leh MLA ka nih leh, party elected OB ka nihna zawng zawngah lawmthu ka sawi a. Tunah chuan party-a mi hmantlak zawkte kianin chawlh ve ka duh tawh a ni,” a ti.
MLA Er R Rohmingliana pawhin thu a sawi a. Congress chu Vairama intan a nih angin central-a an hniam chuan Mizoramah pawh an hniam zel a. BJP pawh Congress ang tho an ni tih a sawi. Mizorama sawrkar mekte foundation chu party hrang hrang kalkhawm an ni a. Founder president nei lo, an MLA-te pawh inthlan dawna an sawmkhawm chawp an ni a, an kal thui vak a ring lo tih a sawi.
MNF chu Mizopa chhulchhuak, Mizorama din, ram leh hnam tana din a nih avangin, tluksawp lai awm mah se, engtik niah emaw chuan a thochhuak leh dawn tih a sawi.