ZPM HIAN KI (KEY)AN LA SANG EM?

Lalchhuanliana Hmar

ZPM kaihhruai sawrkar thar hian rorelna lo chang tawhte aia tha leh dik zawka rorel an tum thu mai piah lamah, an tih ve loh tur, ka ei ru lovang tih thlengin an intiam a ni. Ram rorelnaah bung thar kai tumin “Kalphungthar” mipui huapzo sawrkar din tumin hma an la tan mek a, an hmanhlelin an thawkrim nghal hle a ni. Hetih lai hian mi thenkhat chuan, ZPM hi an insawi ang an ni lovang, tiin hlasak nena tehkhinin, a ki(key) an la sang lutuk a, an sa chhuak zo lovang tih hawi zawngin an lo sel leh hman der tawh thung a.
Hetianga hun leh ni pawhin a la daih lo tih hre reng chunga lo sawisel tute hi chuan, ZPM hian rorelna dik hi an thlen tak tak ang a, an party-in an hlawkpui ang tih hlau an ang ber a, politics hlui zia a ni. ZPM hian kan ramah rorelna dik leh tha zawk min thlen beiseina avangin mipuiin an vote tling a, an chhiat an that pawh la hriat hmaa lo sawisel ai chuan, a tanpuitu leh tiphurtu nih hi mi pangngai tihtur ni zawkin a lang. Kan politician thenkhatte hi chuan tunlai thangthar mi thiam leh mi dikte hi an phu tawh lo zawk a, mipui aia mahni invulhna khawvel emaw la ti tlat, party dang leh mimal sawi chhiata din chhuah tum an la awm a ni. Hetiang ang politiciante hi thangthar mithiam leh dikna duhtute hian an hai lo va, ram aia mahni pumpui hmangaih zawkte hi chu lo inthiarfihlim mai se, ramin a thatpui zawk ngei ang.
Political party reng reng hian tih tum(Policy) an nei vek a, an ti hlawhtling vek ngai lo thung a ni. Tun hmaa sawrkarna lo chang tawhte pawh khan mipui hnena an thutiam an hlen loh ziate chu kan hre vek a, a thente phei chu nuihza siamnan hial kan hmang a nih kha! An intiamna hlen lo va mimal leh party bil an inhaivur nasa ni a mipuiin an hmuh avanga an hnawl pol.partyte chu sawi a ngai awm love. ZPM pawh hian an thil tih tumte (policy) hi a vaiin an ti hlawhtling kher lovang, mahse sawrkar hmasate aia an thawh dika an thawh that zawk chu an intiamna leh an tih ngei ngei tur a ni ang. Chumi kawnga an hmalakna tur atan chuan siam that ngai tam tak pawh a awm ang a, thil harsa deuh paltlang ngai pawh a awm thei ang.Dik tak chuan kan ramah hian dan hian lalna a chang tlem tial tial a, dan lo hi dan dik zawk emaw kan ti lek lek tawh ni te hian a hriat tawh a ni. Hetiang hi kan ram dinhmun a nih tawh avang hian sawrkar thar, ZPM sawrkar hian siam that hna thawk tur chuan a KI (Key) an lak san a tul hle tawh zawk a ni. Tun hma anga a thluk(key) ngai pet peta kal chung chuan kan ram hi an tidam zo tawh lo vang a, a zual zapui vaihlenhlo tih ang chauh kan ni ang.Kan hriat reng tur erawh chu hmasawnna hi lo thleng thut tura ngaih tur a ni lo ang.Sum harsatna avangin hun engemaw chen chu inrenchem a ngai a, leiba tam tak nei leh la bat belh zel ngaih chin a awm dawn niin a lang.Inrenchem kawngah hian kan CM leh a hnuaia miten hma an la nghal a,sawrkar hnathawkte pawh hian kan ram dinhmun leh ram hruaitute rilru hre reng chungin an hamthatnate hi han titlem ve se kan ziaawm mai ang.
Sawrkar thar hi an tang hle ni pawhin a hriat a, hunin la daih lo mah se a fak duhtu tan chuan thil thar engemaw zat hmuh tur a awm tawh a ni. Ni za chhunga an tihtur pawh an bawh zui tha hlein a hriat a, han tang zel teh se.Kan Home Minister hmalakna phei hi chuan hriat a hlawh hle mai a,sawiseltu mi tlemte karah mipui tam zawkten an fak hle a ni. Kan ram chhunga hun rei tak dan lova ram dang Kuhva ualau taka tawlh ruk tih tawp te, Police check gatea pawisa khawn tih tawpte, police hotu pension tawh leh thawklaiten an hamthatna bak mihring leh lirthei an kawlte chu kawl tawh lo tura ngenna a siamte chu dan anga kal tumna kawng vek niin a lang.Minister dangte pawhin theitawp chhuahin an department chante an vil ngun hlein a lang a, han chhunzawm zel se la .Thil fel lo leh dik lo a lo awm anih pawhin inthlahrung hauh lovin a siam that hna han thawk se, ram mipuite thatna tur atan chuan dikna leh rinawmna vawng reng chungin hma han la se, kan ram hi a tha zawngin bungthar min han kaipui ngei teh u.
Kan ram siam thatna atan kan sawrkar thar hian tuna in hmalakna ki (key)hi a sang hran lova, aw tichhang mai lovin a key ngai pat hian han sa chhuak ula, kalphung thar hmel min han hmuhtir teh ule!