Zo hnahthlakte’n sorkar office khar tur ti Manipur sorkar-in office kai turin ti

Lamka-ah Zo hnahthlakte intelkhawmna Indigenous Tribal Leaders Forum (ITLF) te’n Thawhtanni hian sorkar office khar tur an ti a, Manipur sorkarin office kai lote hlawh ‘cut’ tur a ti thung.
ITLF te hian an bawrhsap leh SP te darkar 24 chhunga chhuak turin an ti a, an chhuah loh avangin sorkar office khar tur an ti ta a ni. Inrinni khan sorkar office khar tur tih thu an chhuah a, Manipur sorkarin hemi ni vek hian a chhang let ve nghal.
Ningani zan khan Lamka hi an buai a, mipui lungawi lovin bawrhsap office an bei. Chumi thu kal zelah chuan a lehlam lehlam hi thu hmangin an innawr zui a ni. Thu dawn danin, bawrhsap leh SP te hi an awmna hriat a ni lo a, Lamka chu an chhuahsan lo a, khawi emawah an biru tih chu Zo hnahthlakte hriat dan a ni.
Lamka-a tuna an buaina hi, police SI pakhatin Zo hnahthlak volunteer-te thla a lakpui a, chu chu social media lama a darh hnua intan a ni a, he SI hi an suspend a ni.
Zo hnahthlak lam hian venhim hnathawkte’n Meitei lam thla an lakpuiin an suspend ngai lo tih ngaihdan an nei a, SP pawh an hmu nghal. Mahse an buai ta telh telh a, Ningani zanah mipuiin office an bei ta a ni.
Lamka atanga thu dawn danin, kar hmasa Ningani zan khan bawrhsap office bulah mi an pungkhawm a, bawrhsap office-ah hian bawrhsap leh SP an awm dun a ni. Venhim hnathawkte’n mipui lam hawiin silai an hmet puak ta a, mi pahnihin nunna an chan. Mipui lungawi lo hian bawrhsap office an bei ve nghal a, a kawta lirthei dingte an bei bawk. Lirthei hi Zo hnahthlakte leh Meitei intihbuaina kal meka venhim hnathawktute hman thinte a ni.
Thu a inhmu lo zui a, Lamka-ah hian sorkarin dawr khar tur a tih bakah ni 16 atang khan internet an titawp bawk.
Lamka-a Zo hnahthlak hruaitute chuan Lamka an ralti lo tih an sawi a, sorkarin curfew pawh puang se mi dang tel lovin Zo hnahthlak hlang an awm a, sorkar hnathawkte pawh Zo hnahthlak vek an nih avangin an ralti lo tih an sawi.