Israel-in Brazil president dem hle

Israel chuan Brazil president in Gaza ah Israel chuan genocide a kalpui mek tia sawia Holocaust nena a khaikhin chu a dem thu a sawi.
Luiz Inacio Lula da Silva chuan Israel military campaign chu ‘sipai te leh hmeichhia leh naupang te inbeihna’ tiin a sawi a ni.
Israel chuan Lula chu Holocaust sawinepah puhin Gaza indona a kalpui chhan chu Hamas nuaichimih leh 7 October, 2023 a Hamas militant group tena mi an rukbote chhuah zalen a ni a ti ve thung a. brazil a Jewish organisation te pawhin Lula thusawi chu an dem thu an sawi bawk.
Ethiopia-a African Summit a thusawina a neihah Lula chuan, “Gaza Strip a Palestinian mite laka thil thleng hi history-ah khaikhin tur a la awm ngai lo. A nihna takah chuan Hitler an Jews te thahchimih a tih khan a thleng tawh” tiin a sawi a.
“Sipai leh sipai indona a ni lo va. Sipai inpuahchah tha takte leh hmeichhia leh naupang te inbeihna a ni zawk” tiin Lula chuan a sawi bawk.
Veteran left-wing politician Lula chuan Hamas tena 7 October, 2023 a Israel runa mi 1,200 nunna an laksak leh mitang 253 an lak te chu a dem thu a lo sawi tawh a. Mahse, Israel in a beihletna pawh a dem thu a sawi a ni.
Israel Prime Minister Netanyahu chuan Lula thusawi chu ‘Holocaust sawi nepna leh Jewsih mite tihnat tumna leh Israel in mahni invenna dikna a neih hnawlna a ni’ tiin a sawi thung a.
“Israel leh Nazis holocaust leh Hitler khaikhin hian pawi a khawih” tiin Netanyahu chuan a sawi. Kum 1940 leh 1940 chho khan Hitler a Nazi regime chuan Jewish maktaduai ruk chuang an tihlum a ni. Israel chuan brazilian ambassador chu thuzawhfiah turin a ko zui nghal bawk a.
Lula thung chuan nikuma South Africa in International Court of Justice (ICJ) a Israel chu genocide kalpui tia a khinna chu a thlawp thung a. January thla khan ICJ judge te chuan South Africa case chu kalpui zel tur an lo ti tawh bawk a. Court chuan Israel chu genocidal anga ngaih theih laka fimkhur tura tiin Gaza ah humanitarian assistance luhtir turin a lo ti tawh bawk a. Mahse, court chuan Israel chu military operation titawp tur chuan a ti chuang lo thung.
Brazil leh South Africa te hi ram thang mek intelkhawma Western nation ram hausa te cho phaka awm tum BRICS member ve ve an ni bawk.