Kane goal-in Bayern tlawm tur chhan zo lo

Title race inhrualmum chho meka hmahruaitu fei fuat Bayer Leverkusen tana nuih ver verna thlen turin Pathianni zanah an elpui lian ber leh awmchhun tih ngam tawh Bayern Munich-in VfL Bochum 1848 khelmualah point an thawkchhuak zo lo a, hun pangngai tawp hma minute thum la awmah Harry Kane chuan draw beiseina chhete siamsak turin goal khung mah se mualneitu team hian 3-2 hnehna nen talbuai rei tawh angreng tak Bayern buaina an belhchhah a, tunhnai ni kaw chhungin German champion hi vawi thum tehreng an tlawm tling ta tlat!
Ti hian, khelh 22 ve veah Leverkusen hian point riat zetin an hnuai chiaha pahnihna luahtu Bayern nena an inkar an pawtzau ta a; an manager derthawng tan mek Thomas Tuchel ber pawh a beidawng tan titih tawh niin a lang a, Bundesliga title humhim beiseina chu an tan a chiang lo ruai tawh tih inkhelh banah sawichhuakin, a inhnemna awmchhun ni taa lang chu:
“Season liamta pawh khan season tawp ni thlengin kan bansan duh lo a, a tawpah malsawmin kan awm a, tunah pawh hian bansan mai loin kan thawk chhunzawm zel ang.”
Pathianni zan inkhelah Bavarians tan minute 14-naah Jamal Musiala chuan goal hmahruai a khung zet a, chawlhlawk dawnah Takuma Asano leh Keven Schlotterbeck-te’n Bochum tan goal hnihin an chhanglet a, half time-ah mualneitu team hian 2-1-in hma an hruailet.
Second half laihawl minute 76-ah Dayot Upamecano hnawhchhuah niin, Kevin Stoger chuan penalty atangin 3-1-a mualneitu team hmahruaina goal a chhuihlut zui nghal a; minute thum chiah awm tawhah England captain Harry Kane chuan Bayern goal hnihna khung ve bawk mah se season kal laia a league goal 25-nain mikhual team tlawm tur a chhan zo lo.
Bayern Munich hi season hnuhnung 11-ah khan German champion an ni zawn chho ngat ngat a, kumin zet erawh chu an tan kum chhia ni thei ngei dawnin a lang a, trophy hawn loa campaign an khar kum ni thut thei dinhmunah an ding!
Nikum August thla khan German Super Cup-ah an tla a, November thlaah German Cup atangin second round-ah third-tier club Saarbrucken chuan an petchhuak leh.
Tun February ni 10 khan Leverkusen khelmualah Tuchel-a team hi sithum faiin an tlawm leh a; a hnu lawk tunhnai Champions League last-16 inkhelah mualneitu Lazio chuan sikhat faiin German champion hi an hneh zui leh a, tunah table laihawl hnuai lam chiah luahtu Bochum ngam loin an tlawm zui leh ta a ni.
Vawithum ngawt a team a tlawmpui hnua pressure a hmachhawn mek chungchang sawiin Tuchel chuan, “Hetiangte chu chak loh apianga lo lang ve nghal thin kha a nia. Engtinnge kan khelh tih lai hi a pawimawh lai zawk chu a ni. Engtinnge tih laiah chuan kan tha khawp mai a, tuntum minute 90 chhung hi chu Lazio game-a second half emaw Leverkusen khelmuala kan khawsak dan emaw ai kha chuan tha tak a ni,” tiin chak loh aia mawi lo deuha khelha chak thlang thin coach-te thlir loh danin German coach hi chuan result aimahin an khelh dan a sawimawi zawk tlat!
Tun kha Pep Guardiola hun lai May 2015 hnu lama match thum chhung a zawna Bayern tlawm leh vawikhatna a ni.