Napoli tlawm tur chhantu Osimhen

Nikum December thla hnu lama a inkhelh leh vawikhatnaah Nilaini zan khan Victor Osimhen chuan Barcelona laka Napoli tlawm tur chhanna goal khat khungin, Italy rama Uefa Champions League round of 16 first leg match hi 1-1-in a tawp.
Naples khaw inkhelah hian second half minute 60-ah Robert Lewandowski mikhual hmahruaina goal a khung a; Napoli beilet tan minute 15 an khelh tlin leh rualin Osimhen chuan mualneitu team siphurh a sut a, ti hian, a club vawn lai tana Champions League game a khelh hnuhnung vawirukah Nigerian hian goal a thun kim vek a ni.
Francesco Calzona hoa Napoli inlan vawikhatnaah hian a chuhah an mikhualte hi an pha lo viau a, goal pawh an chhuah hmasa ta reng a, mahse, Osimhen chuan Marc-Andre Ter Stegen dan zawh loh goal hmangin a team tlawm tur a chhan a, March ni 12 khian second leg khelin Barcelona khaw lamah team pahnih an inchingfel tawh ang.
Italian Serie A team tlawm tur chhantu Osimhen kha tun, February thla Africa Cup of Nations final-ah khan Ivory Coast laka tlawm ta Nigeria team-a an player pawimawh niin, international duty atanga a kir hnuah hremna avangin an league game hnuhnungberah a inlan thei lo a, Europe-ah kirin goal a khung zui leh nghal a ni.
Tarlan tak angin, Stadio Diego Armando Maradona inkhelah mikhual team khan bul an tan hmuhnawm zawk a, an rawlthar kum 16 mi lek Lamine Yamal hmuhnawm lehin, Champions League knockout stage khel thei naupangber hian Italian-ho a chhaihbuai fo!
Kum 16 leh ni 223-a upa ni chunga khelmual lut Spanish right winger Yamal khan record a siam zanah goal thun theihna hun tha hmu mah se Napoli goalkeeper Alex Meret a paltlang zo lo.
Xavi team-in na taka an nawr fo karah Meret chuan Lewandowski goal tur a dansak bakah hla deuh zawk atanga Ilkay Gundogan goal tur a namsawnsak bawk.
Italian team hi Serie A title an kawl lai humhim an tumna kawnga talbuai zet niin, table-ah pakuana daih an luah tawh a, hmahruaitu Juventus nena an inthlauhna phei chu point 27 zeta a nih tawh avangin tunkar Thawhlehni khan an manager chhawr lai Walter Mazzarri banin Calzona an senglut a, Slovakia manager ni pah bawk Calzona hnuaia an match hmasaberah Europe-a tlawm an pumpelh ta phawt.
Catalan team pawh kha La Liga lama chetha bik lo niin, table-ah pathumna luahin, hmahruaitu Real Madrid lakah point riatin an hniam.
Inkhelh banah Barca manager Xavi Hernandez chuan Movistar Plus hnenah return leg an hmachhawn leh tur atan Italy rama an result hlawhchhuah kha a tha hran lo tih sawiin, “Game khawiah pawh khan kan chungnung zawk fai vek a, inkhel thunun viau awm tak kan nih laiin kan talbuai tlat a, tlarhma lamah kan hriam tawk lo kha tun season-a kan team khelh dan khaikhawmna atan pawh a hman theih ang,” a ti.
Barcelona kha kum thum chhunga Champions League knockout match an khelh vawikhatna niin, second leg-a Nou Camp lut tur an nih avangin tlang tura beiseiawm zawk an ni lo thei lo.