Tui bill tihsan tumna awm lo GAWSS Phase-III peih tep

Tui bill tihsan tumna a awm loa, Aizawl khawpui chawmtu tui lakna GAWSS Phase-III chu kumin March-ah a taka hman theih tura peih hman an tum tih PHE minister Prof Lalnilawma chuan a sawi.
Assembly Session-a zawhna chhangin PHE minister chuan SIPMIU kaltlanga thawh Greater Aizawl Water Supply Scheme Phase-III chu sawrkar hmasaah a changtu minister-in 2023 September 26 khan a vaia inpeih ni loin a hawng a, diesel engine-a ‘trial run’ neih niin, Tlawng atanag Laipuitlang thlenga pump a ni a, engkim a function tha tih hriatchian a ni tih a sawi.
Tui lakna atana innghahna ber tur chu electric engine a ni, tiin, diesel hmanga tih chuan ni khatah litre 1000 vel ngai tur a ni a, sum dinhmunin a tlin lo tih a sawi. Power pawhluh nan a concern department Power & Electricity-ah load security atan deposit a ngai a, thla thum chhunga sen tur hisap lawkin, cheng vaibelchhe 5.59 chu kumin February 9 khan an deposit fel tawh tih a sawi.
“Tihnuna a taka hmang thei turin SIPMIU-in ni 30 ralhmaa a enfiah a ngai a, tui supply hi awm thei tura ngaih a ni a, full completion hunah chuan kan la hawng nawn maithei,” Prof Lalnilawma hian a ti.
Zawhna dang a chhannah minister chuan, tunah hian Aizawl khawpuiah mihring 378500 vel awm ang a ni a, hnianghnar taka tui dawng tur chuan Central Public Health and Environmental Engineering Organisation (CPHEEO) guidelines-a ni khatah litre 135 (litre per capita per day – LPCD) angin tui 66.42 MLD (million litre per day) mamawh a ni a. Tunah hian tui 28.77 MLD nitin pump chhuah a ni.