MYC chairman-in thalaite tan kawng dap chhunzawm

Mizoram Youth Commission chairman Malsawmzuala Ralte chuan Zirtawpni khan National Skill Development Corporation office-ah lengin CEO Ved Mani Tiwari leh national head state engagement Mayank Bhatnagar te a kawm a. Mizo thalaite tana skill development training buatsaih dan tur sawi hoin, hma lak ho nise an ti. Okhla Industrial Estate-a Mizo thalai kut themthiamna lam zir tura thawn theih dan tur pawh ruahmanna siam nise an ti bawk.
Confederation of Indian Industry Summit Delhi-a neihah MYC chairman hi tel nghalin, CII principal advisor Brig. Ashis Bhattacharyya (Retd) nen inkawmin, CII hian skill leh entrepreneurship development training a bika an buatsaih thin dan leh a training chhuakten zaah za hna an hmuh nghal thin thu an sawi a; hetiang lam training hi buatsaih ho ni se, tiin an rel.
MYC chairman hi OSD to CM Jonathan Lalremruata’n a tawiawm a ni.
Zirtawpni vek khan Malsawmzuala Ralte hian HCL Foundation office Noida-a tlawh a, general manager Robin Thomas leh manager Anjul Srivasta te nen inkawmin, Mizo thalaite tana hmalak theih dan tur an sawiho.
HCL Foundation hotute chuan an programme pakhat ‘sports for change’ hnuaia MYC nen an thawhho theih thu an hrilh a. Mizo thalai leh naupang harsa zawkte tan sport discipline hrang hrangah mumal takin training an pe thei a, infiamna lama Mizo naupangte theihna haichhuah kawnga hma la ho turin ruahmanna an siam a; remchang hmasa berah Aizawla an zin tur thu an hrilh bawk.