Hmunphiah lei tumte vautu man thuai turin CM phut

Hmunphiah lei tumte vautu
man thuai turin CM phut
Mizorama hmunphiah thar lei tum hnamdangte vau pawl an awm nia chief minister Lalduhoma’n a sawi chu rang taka manchhuah thuai an phut tih MNF Thalai chuan an sawi.
MNF Thalai Hqrs. thuchhuak chuan, February 21 Assembly Session-a hmunphiah chingtute harsatna chungchang chief minister-in a sawinaah, hmunphiah hring lei tum Vai lokal turte chu lo danga lo vau pawl an awm tih a sawi a. Hmunphiah lei tura an tih an agent-te hlawhchhamna phat mawi a tumna nge, thudik a nih chuan thil pawi tak leh ngaihzam mai mai chi loh, sumdawng bakah hmunphiah thartute dikna rahbehna diktak a ni tih a sawi.
‘Hmunphiah thartuten an hmunphiah hralh chhuah kawnga harsatna namen lo an tawh lai a, hetianga invau leh tharum thawh tuma mi eizawnna tihbuai hi dan bawhchhiatna lian tak a ni a. Fake account chhui kawnga reilote chhunga chak taka hma la thei sawrkar hian hetianga dan kalha chea mi eizawnna tibuaitute hi chak taka chhuiin action a lak ngei kan phut a ni,’ a ti.
Hmunphiah thartuten an hmunphiah thar hralhna kawnga harsatna an tawhnaah chief minister-in an agent-te thiam loh a ni a, sawrkar thiam loh a ni lo, tia kut a sil leh daih si ah MNF Thalai hian puhin, ‘Hei hi chhuanlam a tling loa, mawhphurna la ngam hruaitu sawi atana thil inhmeh lo ni ah kan ngai,’ a ti.
Sawhthing leh thlai thar dang pawh hralhnaah harsatna lo thleng ta se, sawrkar hian mahni indah fihlimin agent-te bawk a puh leh angem tih chu an zawhna a ni tih a sawi a. Sawrkar hmasa sum hnutchhiah hmanga ni thum chhung leka thlai thar lei nana vaibelchhe 110 dah thu ropui taka puan chu eng atana hman tur nge tih leh, tun hun hi a hmanna tur dik tak a ni lo em ni tih an zawh thu a sawi bawk.
Sawrkar chu hmunphiah lei chungchangah agent-te mawhpuh mai loin, manifesto-a a lo dah tawh ang leh sawrkar hmasa sum hman ban atanga vaibelchhe 110 thlai thar leina atana a dah angin, a thu ni lo a tak ngeia hma la turin an phut tih MNF Thalai hian an sawi.