Muslim-te hlauhthawnna MHA-in chhang

Citizenship (Amendment) Act (CAA) chungchanga Muslim tena hlauhthawn an neihah zawhna chhangin Ministry of Home Affairs (MKA) chuan “He Act hman hnuah Indian khua leh tui tute mah khua leh tui an nihna document pharh tura phut an ni dawn lo” tiin a sawi.
MHA chuan press note “positive narrative on CAA, 2019” a tihchhuahah Islam leh Muslim nghawng thei dawna sawina zawhna pariat chhanna a siam a ni. Mahse, he document te hi March 12 khan sorkar website atangin a la thla leh thung.
India rama Muslim te CAA in a nghawng dawn em tia zawhnaah MHA chuan, “CAA chuan khua leh tui te nghawng a nei lo va, Indian Muslim vaibelchhe 18 te tan engmah hlauhthawn tur a awm lo va, Indian Muslims te chuan Hindu te ang bawkin rights in ang tlang an nei vek a. He Act hman hnuah Indian khua leh tui te khua leh tui an nihna finfiahna document phawrh tir an ni dawn lo” a ti.
Pakistan, Afghanistan leh Bangladesh atanga sakhuana thila tihduhdahna avanga December 31, 2014 hmaa India ram lutte khua leh tui nihna pek theihna CAA bakah ram pum huapa kalpui National Register of Citizens (NRC) kalpui tur chuan Muslim community te a nghawng hle dawna ngaihna a awm a. CAA hmangin NRC in a huamloh non-Muslim te chu chhanchhuah an nih theih dawn laiin Muslim te chuan khua leh tui an nihna fiahna an neih a ngai thung. CAA parliament a passe da nih hnuah December 2019-March 2020 inkar chhungin Assam, Uttar Pradesh, Karnataka, Meghalaya leh Delhi ah te lungawilohna lantirnaah mi 83 chuangin nunna an chan a ni. Centre erawh chuan parliament ah ‘sorkar chuan NRC chu national level a kalpui turin thutlukna a la siam lo’ a ti thung a. CAA leh NRC chu inzawm tlat tia sawina pawh a hnawl a ni.
Mahse, Citizenship Act, 1955 hnuaia Citizenship Rules 2003, National Ppulation Register (NPR) te Census first phase ruala update turte chu NRC compilation kalkawng a ni thung. Heng rule te hi amend emaw hnawl emaw a nih loh avangin NPR kalpui tur chuan legislation thar a ngai dawn a. Assam chu NRC kalpuna state awm chhung niin Supreme Court thupeka kalpuiah diltu 3.29 crore atangin 19 lakh te chu hnawlin an awm a ni.
Ministry chuan March 12 khan CAA chuan Indian khua leh tui nih theihna qualification period kum 11 tih chu Pakistan, Afghanistan leh Bangladesh atanga sakhuan thila tihduhdan tuar bik te tan chuan kum 5 ah tihhniam a ni a ti a.
“Dan kalha Muslim migrant awm te Bangladesh, Afghanistan leh Pakistan ah thawn haw tumna a awm em?” tia zawhna chu MHA chuan, “Heng ram te nen hian migrants thawnlet chungchangah India chuan inremna engmah siampui a nei lo” tiin a chhang a.
CAA chuan illegal immigrants te thawnhaw a buaipui dawn lo va, hei vang hian Muslim leh zirlai tena he dan hi Muslim minority te beihna tia sawi chu a dik thei lo a ti bawk.
MHA chuan CAA chuan illegal migrant te chu foreigner India rama document awm lova lut tia sawiin Citizenship Act, 1955 ang chiah a ni mai a ti bawk a.
“CAA in Islam sakhua a nghawng dan tur” tia zawhna pawh MHA chuan, “Heng Muslim ram pathuma skahuana avanga tihduhdan thleng hian Islam hmelhmang chu khawvel pumah a tibal em em a ni. Mahse, Islam chu peaceful religion a nih angin huatna/tharutmhawhna/tihduhdahna sakhaw thilah a kalpui gnai lo. He Act hian sakhuana thila tihduhdan tawk te chu lainatna a lantir a, tihduhdahna avanga Islam hmingchhe tur a veng bawk a ni” tiin a chhang bawk.
Ministry chuan khawvel hmun tina Muslim ten Indian khua leh tui nihna neih an duh a nih chuan Section 6 of the Citizenship Act hnuaia citizenship by naturalisation in a neih theih reng a ti bawk a.
“CAA in naturalisation law a hnawl lo va. Chuvang chuan mi tu pawh Muslim migrant ram dang mi te chuan Indian khua leh tui nihna dan ang thlapin a dil thei reng a ni. He Act hian heng ram pathuma Muslim te chu dan awmsa hnuaia India khua leh tui an nih theihna tur kawng a dal lo” tiin Ministry of Home Affairs chuan a tarlang bawk.