Taylor Swift ‘Eras Tour’-in Disney+ record a siam

Tunlai chu Taylor Swift leh record siam tih hi a inhmeh riau tawh, tunah pawh a concert film chuan Disney+ ah music film zinga stream nasat ber record a siam leh der tawh. Chu pawh ni thum chhung lekin!
Taylor Swift = The Eras Tour hi cinema hall-ah chuan thla nga kalta khan an tlangzarh tawh a, cinema hall lamah pawh record a siam tho a, concert film zinga box office sum lalut hnem ber a ni a, tunah Disney+ ah an tichhuak ve leh ta a, ni thum chhungin music film zinga he streaming service a stream nasat ber record a siam leh der tawh.
Hollywood Reporter-in a tarlan danin he concert hi, March ni 14 atanga Disney+-a an tihchhuah tan hian ni thum chhunga a entu zawng zawngin an en hi belhkhawmin darkar maktaduai 16.2 a tling! He film hi darkar thum chuanga a sei a ni lehnghal a, music film dang Taylor Swift ‘Folklore: The Long Pond Studio Sessions,’ Elton John: Farewell From Dodger Stadium, Black Is King: A Film by Beyonce leh The Beatles: Get Back te a khum nghal vek a ni.
He concert film hi nikum October khan cinema hall-ah chhuah tan a ni a, a weekend vawi khatnaah cinema hall ticket hralhna atangin dollar maktaduai 92.8 lalut theiin record a siam a, khawvel huapa dollar maktaduai 250 chuang lalutin, concert film zinga sum lalut nem ber record a siam bawk. He film hi December thlaah hla pathum ‘Wildest Dreams,’ ‘The Archer’ leh ‘Long Live’ performance te deh belhin hei hi a kum 34 tlinchampha puala a tih a ni.
Tuna Disney+ version-ah hian a concert film-a a dah tel loh performance dang ‘Cardigan,’ ‘Maroon,’ ‘Death by a Thousand Cuts,’ ‘You Are in Love’ leh ‘I Can See You’ te a dah belh leh a, hei hian streaming lamah pawh a boruak a vawrh lehzual ta a ni.