Bail-in pawngsuala thiamloh chang Alves a chhuak

Nimin, Thawhtanni khan Brazilian footballer Dani Alves chu a tanna Barcelona khuaa Brians 2 lung in atangin bail-a chhuahtir a ni a, a ukil Ines Guardiola chuan jail atang hian a hruaichhuak.
Kum 2022-a Barcelona nightclub pakhat restroom-a hmeichhe pawngsual thubuaiah Brazilian hi thiamloh chantir niin, karliamta Nilaini khan court chuan kum li leh a chanve tang turin a chungthu a rel a, a chunga hremna (rape conviction) a khinlet hnuah tualchhung court chuan euro maktaduai khat (USD 1.09 million) a pek theih chuan bail-a chhuah a remtih thu a puang a, Thawhtanni khan Barcelona khaw hmar thlang lama Brians 2 prison atangin Alves chuan tuallai a rap leh thei ta a; a ukil nen lung in an chhuahsan lai hian jacket buang uk lam nghawng hlai hlep hlawp hain, a hnuaiah highneck var a inbel a, jean kekawr hain, pheikhawk dum a bun bawk.
Lirthei vara a luh hmain amah beiseitu chanchinbumite a uksak lo a, bail-a a chhuah chhunga dan zawm ngai zawng zawng zawm famkim turin phurhbo a ni zui ta a ni.
Football chanchina player hlawhtlingberte zinga mi a nihna piahlamah Alves-a case hian ngaihven hlawh zualna tak a nei a, Spain ramah hian mipa leh hmeichhe inkara tharum thawhna chungchang chuan khel a hlawh zual lai taka case awrh a nihna avangin Brazilian thubuai hian mi ngaihven leh sawi zui a hlawh zual a ni.
Kum 40 mi Alves-a aiawh chuan chhuah lailawk a nih chhunga Spain ram a chhuahsan lohna’n a Brazilian leh Spanish passport chu thuneitute hnenah a thehlut a, chawlhkartin Zirtawpni zelah emaw koh a nih hun hunah court hmaa inlan zat zat tura intiamtir a ni.
Tarlan tawh thin angin, hetia bail-a a chhuah lai hian pawngsuala puhtu hmeichhia chu Alves hian metre 1,000 (3,300 feet) aiin a hnaih a thiang lo.
Barcelona, Juventus leh PSG defender hlui hi nikum January thla atang khan Brians 2 lung inah hian a la tang ngat ngat a; thla hmasa mai February ni 22 khan convict a ni a, pawngsuala puhtu hmeichhe hnenah euro 150,000 pe turin Barcelona court chuan a hriattir bawk.
Footballer Dani Alves leh a thianpa chuan Barcelona nightclub-ah khan nula la naupang tak tak pathum chu zu (champagne) an leisak a, an zinga pakhat chu Brazilian hian club chhung VIP area bathroom-ah thlemlutin a pawngsual zui ta niin hmeichhia hian court a hrilh a; a tirah Alves hian a puhtu hmeichhia chu a hriat mi a nih loh thu sawi zet mah se an pahnih remtihdunna ngeia sex hmang an nih thu a sawi.