Congress, MNF leh BJP official candidate-ten nomination an file

April 19-a Mizorama Lok Sabha inthlanpui neih turah Nilaini khan Congress, MNF leh BJP official candidate-te chuan returning officer hnenah nomination paper an thehlut.
INC candidate Lalbiakzama chuan returning officer, Aizawl district election officer Nazuk Kumar hnenah nomination a file a, hemi hnua thuthar thehdarhtute zawhna chhangin Lalbiakzama chuan, tuna BJP sawkarin hnam tenau zawkte min nekchepna atana dan an hman hi, MP a niha central-ah India Block a sawrkar chuan hnuhlet a nih theih nan hma a la dawn tih a sawi.
India rama hnam tenaute nekchepna leh tihduhdahna hluar ta leh sakhaw zalenna bo ta chu an auhla ber tur a ni, tiin, “A bikin, Forest Conservation Act hi Mizoram tan thil hlauhawm tak a ni a. UCC hi tunah kan ramah hman ni lo mah se, Parliament-a pass a nih tawh avangin dan awmsa a ni tawh a, nakin lawkah min hman tir dawn em kan sawi thei lo. Keimahniin hnam dan kan nei a, inneihna dan, ro inkhawm dan, nau lak dan kan nei ve vek a, chuvangin UCC hi kan dodal a ngai a ni,” a ti.
MNF candidate K Vanlalvena chuan kan ram, hnam leh sakhua a him theihna turin Parliament chhung leh pawnah a tul anga che turin Rajya Sabha MP a niha a activity enin, party dang candidate te ai chuan Zoram mipui mamawh chhanna ni dawnin a inhria tih a sawi. “NDA hi political party 45 insuihkhawmna a ni a, kan Kristian pui Meghalaya leh Nagaland a sawrkar mek pawh NDA ah an tel. A chhung atang hian BJP chet dan tha lo tih hi pawnlam atanga do ai chuan a hlawk zawk tih hi a taka hretu kan ni,” a ti. Kum 4 leh a chanve chhung Parliament-a chetla tawh a nih avangin candidate dangte ai chuan a ngampa zawk dawn tih a sawi a ni.
BJP candidate Vanlalhmuaka pawhin Nilaini khan RO hnenah hian nomination a file a. BJP Mizoram thuchhuak chuan, an candidate hi MP a nih chuan NE state atangin State president nilai MP candidate awmchhun tur a ni a, central lamah chanvo tha tak pek a ni dawn a, central sawrkara tlang taka Mizoram mamawh sawichhuak thei tur a nih avangin, mipuiin vote pui vek turin an ngen tih a sawi.
Inthlan dawn hnaihah Congress party chuan dawt hmangin BJP an bei thin tih sawiin, ‘Inthlan dawnah phei chuan video hlui tak tak hmangin nasa takin mipuiah sakhuana rawngkaiin BJP an bei thin a. BJP hian Kristiante thlavang a hauh nasat zia leh India rama chanvo pawimawh a pek nasat dan, hnam tenau leh sakhaw tlem zawkte tana chanvo a pek dan hi Congress sawrkar khan a tih ve ngai loh bakah BJP-in India ram hruaitu lu ni tura Kristian pa an rawtna tam tak dodala paihthlatu an ni zawk,’ a ti.
MP candidate zingah ZPM official candidate Richard Vanlalhmangaiha chuan nomination paper a lo thehlut tawh a ni.