Thailand-ah Neih inang inneih remti

Thailand chuan marriage equality hnaih hle tawhin lower house chuan neih inang inneih (same-sex marriage) dan anga remtihna a pe ta a.
Mahse Senate remtihna la mamawh niin chu bakah dan a nih tak tak theih nan chuan Thailand lal in remtihna a pek a la ngai bawk.
Mahse kum 2024 kum tawp hma ngeiin remtihna pek vek a nih rin niin Thailand chu South East Asian rama same-sex inneih remti awmchhun a ni a, chumai bakah LGBTQ+ couple-te tan vanram ang hiala sawina chu a nemnghet zual bawk.
“Hei hi inneihna lama intluktlanna intanna a ni. Harsatna tinreng chinfel vekna a ni lo nachungin intluktlanna a awm theih nana pen lakna pawimawh a ni” tiin Danuphorn Punnakanta, MP leh lower house committee on marriage equality chuan a sawi a. “He dan hian heng mite hi an rights peklet a duh a, rights a pe a ni lo” a ti bawk.
He dan thar hi lawmaker 415 zingah 400 lawihin an pawmpui a, inneihna chu mipa leh hmeichhiaah chauh ni lovin mihring pahnih induhtawn te tih a ni ta a ni. Ti hian LGBTQ+ couple te chu marital tax savings, property chhawm leh medical treatment thlengin an neih theih phah dawn ta a ni.
Dan hnuaiah same-sex couple-te chuan falak pawh an thei tawh dawn a. Mahse, lower house chuan committee tena rawtna an siama ‘fathers and mothers’ ti tih aia ‘parents’ tih hman ni se a tih erawh an pawm lo thung.
Thailand-ah hian gender identity leh sexual orientation avanga inthleibikna a lo khap tawh a, Asia rama LGBTQ+ friendly nation tia sawi thin a ni.
Mahse same-sex couples te inneih remtihna a neih hma hian kum tam tak hun a duh a. Tun hma pawhin mipui nawlpui tena an pawmpui chungin dan anga siamin a awm mai thei lo. Nikum khan sorkar in survey a neihah Thailand mipui 96.6% te chuan same-sex marriage chu an thlawp a ni.
Nikum inthlanpui neih hma khan political party tam takte chuan thlantlin an nih chuan same-sex union an remtih tur thu an tlangaupui hlawm a. Prime Minister Sretta Thavisin pawhin nikum September thlaa chakna a chan hnuah a thlawp thu a sawi nghal a ni.
December thlaah lower house chuan same-sex marriage pawm a nih theih nana bill pali putluh chu an pawm nghal a, heng bill pali zinga pakhat chu Thavisin administration putluh niin a dang pathumte chu opposition party-te putluh a ni thung a. Heng bill palite hi belhbawmin bill pakhatah siam a ni ta a ni.
Kum 2019 khan Taiwan parliament chu Asia khawmualpuia same-sex marriage remtihna hmasa ber a ni a. Nikum November thla khan Nepal-ah pawh neih inang inneih remtih a lo ni tawh bawk a ni.