Ruihhlo leh cyber crime beihlet beihpui thlak a ngai – SP Aizawl

Pawikhawihna hrang hrang titlem tura tan lak a tul rualin, ruihhlo leh cyber crime titlem tura beihpui thlak a ngai tih Aizawl district superintendent of police Rahul Alwal chuan a sawi.Tunhnaia Aizawl SP atana dah thar Rahul Alwal chuan thuthar thehdarhtute zawhna chhangin, khawtlanga sualna hrang hrang thleng thin chu tih tlem tial tial a ngai a, chu’ng zingah chuan ruihhlo hluar ta lutuk chu beihlet a ngai tih a sawi. Chhungkua leh khawtlangah ruihhlo that lohna inhrilhhriat tam a ngai a, hemi atan hian tlawmngai pawl leh pawl dangte thawhpui an tum dawn tih a sawi.
Internet kaihhnawih inbumna chu a tuartu an tam tawh ang hu in, police hnena zualko an la tam tawk lo tih a sawi a. Mipuiah heti lam inhrilhhriat leh zirtir tam a tul hle tih sawiin, amah chu hetiang lama thiamna nei a nih bawk avangin police pawhin tan an la thar dawn tih a sawi a ni.
Heng thil pahnih bakah hian kum tling lote laka pawikhawihna lam, POCSO Act bawhchhiat a nih lohna turin tan a ngai a, heti lam kaihhnawih thei tlawmngai pawlte pawh la titipui a, tan lak ho dan zawn a duh tih a sawi.
Suahsualna leh pawikhawihna hrang hrang do turin theihtawp chhuah tum a ni, tiin, rukruk leh tualthahna ang chi chhui tur bik team ruat an ni anga, CEIR application hmangin awlsam takin mipuiin phone bo leh thildang bo an report thei dawn tih a sawi a ni.
Lok Sabha inthlanpui atana Aizawl district bik dinhmun leh Police department inbuatsaihna a sawi a. Sakawrdai leh a chhehvela critical polling station pathum awm chu, tharum thawh leh invauna lam thil awm theih a nih vang lam aiin, ramri hrul a nih vanga puan mai a ni a, tun dinhmunah inthlanpui inbuatsaihna a ralmuang hle tih a sawi a ni.