Heroin leh meth man

April 1 chhung khan Excise & Narcotics Department chuan heroin leh methamphetamine an man a. Directorate of Revenue Intelligence (DRI) Aizawl Unit pawhin methamphetamine an man ve bawk.
Excise & Narcotics Department chuan April 1 tlai dar 4.00 khan Chaltlang Lily Veng (State Guest House bul) ah heroin gram 11 (hawng 1) leh a neitu nia puh Lalmuankima (32) Durtlang Leitana khawsa nia inchhal an man a. He case chhuizuinaah Apri1 1 vek zan dar 11.55 khan Hunthar Vengah he thila inhnamhnawih dang – KC Thangmawii (44) Zokhawthar Champhai district; Lalthanpari (54) Falam Myanmar, tuna Hunthar Veng Aizawla khawsa mek leh Tluangthanpari (39) Falam Myanmar, tuna Bawngkawn Brigade-a khawsa mek nia inchhalte an man a. An hnen atang hian heroin gram 109 (hawng 10) leh methamphetamine kg.5 & gram 888 (mum 60000) an man bawk.
Ruihhlo vanga mante hi ND&PS Act 1985 tlawhchhanin thubuai siamsak an ni a. He thubuaiah hian thiam loh chantir an nih chuan kum 10 atanga 20 thleng jail tan leh sumfai Rs. 1,00,000 atanga Rs. 2,00,000 thleng chawi tura hrem theih an ni.
DRI Aizawl Unit chuan 2024 April 1 tlai khan Zarkawta maxi cab stand-ah methamphetamine kg.2 a rit an man a, an hralh lehna anga chhutin cheng vaibelchhe 2 hu a ni tih an sawi. He thila inhnamhnawih mi pakhat an man tel a, chhuizui zel a ni. Ruihhlo an man hi Myanmar lam atanga Mizorama tawlhruk a ni tih an sawi.
Myanmar atanga Mizorama tawlh ruihhlo zingah, heroin hi Mizoram chhunga hralh tur bakah Mizoram paltlanga state pawn lama kalpui zel tur engemawzat a awm tih hriat a ni. Methamphetamine bik chu Mizoram chhunga thehthang a awm meuh lo nia hriat a ni a, state pawn leh ram danga kalpui zel tum, Mizoram kaltlanga tawlhruk mai chauh tih sawi a ni.