Social Media vangin Women Commission-in thubuai ziaklut

Social media thlipui a’n tleh tak tak mai a, hman ni lawka “thil tih awm loh”-a ngaihte kha tu tu emaw chuan ngaiah an neih ta emaw tih tur a ni ta a, mipuiin an en luih luih, an inthawn darh chur chur mai. Women Commission lam pawhin case an siam e.
Tun hnaiah social media lamah mipat hmeichhiatna lam hawia mawi lo taka chetna video clip a darh a, zu nena inchiahpiah taka chetna te pawh a darh. A darh a ni mai lo a, miin an en luih luih! Hmeichhe zahawmna tihbawrhbanna lam pawh social media-ah hian a darh thin.
Mizoram State Women Commission chuan social media-a thil him lo darh, hmeichhia ngei hmeichhiatete zahawmna tibawrhbang zawnga an chetna thil darh chungchangah tun hnaiah case an siam thar. He case hi miin an report ni lovin suo moto hmanga siam a ni.
“Tunlai hian Mizo hmeichhe thenkhat te’n hmeichhe zahawmna tibawrhbang thei turin social media kaltlangin video leh thlalak an tarlang ta fo mai a, a lo thlirtute ngaihtuahna hruai sual thei tur angin mipat hmeichhiatna mai bakah dan phal loh zu te nena chettlatna ni awm takte pawh ualau takin hmuh theihin a awm a, hetianga social media kaltlanga intarlannate leh a kaihhnawih mipat hmeichhiatna hawi zawnga video hmuh tur awm ta fote hi Mizoram State Commission for Women chuan a ngai thu tak hle a, tun tumah pawh hian suo moto thubuai siam niin, chak taka hmalak mek a ni,” commission chairman C Lalchhandami chuan a ti.
Hetianga lo che mawi lo an awm palh changa social media khawih thin leh youtuber thenkhat te’n boruak sosang zawnga thil an vawrh darh zel mai hi Women Commission chuan pawi a ti hle a, hetianga mipat hmeichhiarna rawngkai thlalak vawrhdah te hi dan anga hrem theih a ni tih hriat a tul tak meuh meuh bawk,” a ti bawk.