AIZAWL KHAWPUI I THIANFAI VE ANG U

Terina, Zotlang

“Aizawl hi khaw tawp ber kan lo nih zawk hi mawle” tia mi tam tak, thingtlang khua tlawh tam deuh zawkte tawngkam hi a dik thui viau mai thei. A ni lah tak a, khaw hrang hrang atanga a tawp tawp pem khawm chu kan ni bik awm der si lova. Khaw fai tak tak atanga rawn pem tam tak hi mahni awmna veng faina kawnga tangkai pawl kan ni lo thin hi a pawi khawp mai. Mihring kan tam na na na chuan hnawmhnaw kan lo ngah lo thei lova, a theh thang danah kan sawrkar leh AMC pawhin theihtawp chhuahin hma an la reng bawk a, fai mai chu harsa awm lo tak a nih vei nen. Mizorama a khawpui ber kan han tawp ber hi chu’h, a chhunga chengte hian mawh kan phur nasa em em a ni ringawt mai. Hawh u, insangmarin puanven sawi chhing ila, i thianfai ve ang u.
Aizawl khawpui veng tinah Local Council tha tak kan nei theuh a. Anni kaihhruaina hnuaiah mahni veng theuh kan thianfai thei. Chumi piah lama pawimawh em em mai chu, veng leh veng inrina luikawr tawp lutuk hi kan tanrual phawt chuan kan vawngfai thei ngei ngeiin a rinawm. Veng inthenawm apiangin kan inrina chungchangah Joint Meeting nei theuh sela, tihfai tur chin, chan insem emaw, a huhova hnatlan emaw rawtin hma i han la ve reng reng teh ang u. A bul hnaia chhungkaw tinte lo vil zui turin chah ila, tute emaw bawlhhlawh lo paih man chhuah theih phei chu pawisa tam tham tak chawitir zel ni se. Hremna hi chelek thiam chuan a va’n tangkai dawn em!
AMC Ward 19 lai kan nei a, Ward tin hian Fai endiktu (Inspector) pakhat tal nei theuh thei ila chuan (Mizote chu endik avanga thil tha zawk ti thei kan ni a) sawrkar pawisa sen belh nasa lutuk ngai lo hian kan fai em em ang. Faina kawnga hma la tha lo veng apiang, an veng hmasawnna hna (Development work)ah sawrkar lam hian hrek hreh lo bawk sela, rei lutuk lovah hma kan sawn duak duakin a rinawm tlat a ni.
Veng tin hian Dan (Sanitation Rules) inrualkhai, chhungkaw tin hnena sem/leitir tur hi nei vek bawk ila, chu dan chu a taka hmang ngei turin Local Council te tihchak ni bawk se. Fur apianga kan khawlai tawp lutuk leh leimin tam lutuk thin hi kan pumpelh teuh thei ngei bawk ang. (Sanitation Rules duh leh mamawh tan a sample ka nei reng a ni)
AMC thuneitute hian Sanitation Inspector-te report karhnih dan zelah tal lakhawmin, harsatna nei lian deuh vengte tlawh chhuak thin se, kawng thui takin an sukiang ngeiin a rinawm bawk. Aizawl dai hnai vela leivung leh bawlhhlawh paih ruk tam lutuk pawh hi a Area neitu veng kutah dah thiam se. A tul phei chuan CCTV pawh dah fur mai ila, hma kan va’n sawn dawn tak em!
Heng bak pawh hi a la tam hle. Kawng dunga Motor dah tam lutuk te, workshop thli mawm zel zul kawngpuia luang te, khawpui kawng dung tluana hrui inzam hnawk lutuk te, ui leh ar khawlaia la tla duah duah nei veng te, ranvulhna rimchhia kawng kal paha hriat tur te, in sakna bungrua rei tak tak kawngsira chhawp te, mahni compound zawn vawngfai tha lo te, khawlaia kuhva eina chil sen chhak ching te, meizial bung paih mai mai te leh kawng dang dang pawh sawi tur a la tam khawp mai.
Sawrkar leh khawtlang hruaitute kuta dah kan la ngah lutukte hi mipui lam inenfiahna tur pawimawh tak a va’n tling teh rua em! Chhungkua atanga bul tanin han inzirtir uar leh deuh ila chuan, mi changkang chen tamna State nih hi a har lutuk dawn lo a ni.
A tawp berah chuan “Fai hi a huhova Chanchin |ha hrilh darhna hmanraw tha ber a ni” tih hi pawm tlat chungin mahni in leh a chheh vel hi i vawng fai theuh ang u.