F1 neitu Liberty Media kutah MotoGP tlulut ve leh
F1 neitu Liberty Media kutah MotoGP tlulut ve leh
Formula One neitu Liberty Media chuan Spanish company Dorna Sports kut atangin bike intlansiak level sang ber MotoGP an lei a, US media inhlawmkhawmin motorbike series an leina man hi pound vaibelchhe 3.6 (£3.6bn) ngawt a tling!
Kum 2017 atanga car intlansiak level sang ber F1 thunun tantu Liberty hian kum 1992 atang daih tawha MotoGP lo ta neih tawh Dorna kut atang hian thuneihna zaa 86 an chang phawt dawn a, a bak sumdawnna la bang chu Spanish company hian chang zui rihin, kumin kum tawpah Liberty Media hian official-in thuneihna pumhlum an chan hman rin a ni.
Liberty Media president leh chief executive officer ni bawk Greg Maffei chuan live sports-a chanpual an neih belh avangin an company an phur hle tih sawi chungin, “MotoGP hi khawvel huap league rintlak niin, fan base phurawm zet a keng tel a, racing ngaihhlut hlawh leh sum tam tak virpuitu a ni.
“He business hian hma a sawn zel a, chutih rualin MotoGP fans, teams, commercial partners leh kan shareholder-te tana he sport thanlentir zel hi kan tum dawn a ni,” a ti.
Dorna chief executive officer Carmelo Ezpeleta pawhin MotoGP an hralhna Liberty fakin, sport rohlu cherchhuah zel kawnga record nei tha chungchuang an nih thu a sawi a, chutih rualin, khawvel huap sport an chherlenna kawnga Dorna hnathawh a chhuan thu leh an hralhna sum hraw lutuk chuan tunlai sport khawvela MotoGP hlutna a pholan thu leh thang chho zel tura motorbike series chuan theihna a neihzia lantirtu a nih thu a sawilang tel.
MotoGP season hmasaber kha kum 1949 daih tawh niin, khatih lai racing kha round ruk lek a la ni a, hmalam pan zelin, tunah zet chuan khawmualpui panga a tuam tawh a, season khatah grands prix 20 zet an tlan tawh a ni.
Point 60 hum chungin Spanish rider Jorge Martin chu kumin championship hmahruaitu a ni mek a, point 42 khawl tling ve tawh Brad Binder of South Africa chuan Prima Pramac Racing (GP24) rider Martin hi rider standing-ah a dawt.
2024 MotoGP race calendar ang chuan kartawp Inrinni hian Autodromo Termas de Rio Hondo, Santiago, Argentina-ah 2024 Argentine MotoGP tlan leh tur a ni.