Kumin India ram khawlum a nat hmel

Indian meteorological Department (IMD) te chuan India chuan kumin nipui lai (April-June) ah heat wave average aia chung a tawng thei tiin an sawi a. India ram hmun tam zawkah above-normal temperature record a nih rin a ni bawk a. Khawlum chuan a bik takin southern peninsula, central India leh east India te tuam na dawnin a tuam nat ber tur chu northwestern plain te a ni ang a ti bawk.
Chutihlaiin India chuan power demand a phuhru thei meuh lo va, summer laiin power demand a sang zel dawn bawk si a ni. Reuters analysis report chuan India hydroelectricity output chu March 31, 2024 thleng kumkhat chhung khan kum 38 chhunga a tlakhniam ber a ti. Lohtheihlohin hydroelectricity output chu thla eng emaw chhung chu a la tlahiam zel dawn sa bawk a, chuvang chuan coal ah nasa zawkin innghah a ngai dawn a. Mahse, India chuan Paris Agreement a Nationally Determined Contributions a hming ziah hnan tu niin chutah chuan emission pek chhuah chu kum 2030 ah GDP atanga hisapin 45% aia hniama dah intiam zingah a tel bawk si a ni.

Sawilawk tute sawi lawk dan?
IMD forecast chuan khawlum chuan India ram pumn deuhthaw khawchhak leh hmarchhak leh hmarthlang lam tlemte te tihchauh loh chu a tuam dawn a, above-normal maximum leh minimum temperature an tawng ang a ti. Chu chuan khawlum lutuk avanga natna hrang hrang te kaichhuak theiin leh agricultural output a khawih thei dawn a, tui a vang ang a, energy demand a tisang ang a, ecosystem leh air quality a nghawng bawk ang.
April thlaah a bik takin southern peninsula, northwest central India, east India leh northwest plains-ah te heat wave a thleng nasa dawn a ti bawk.
El Nino event, ruahsur titlema India khawlum tizualtu chu kumin kumtir atang khan a chak lo tial tial thung a, mahse El Nino condition chu equatorial Pacific-ah a la awm renga chu chuan sea surface temperature a tisang a ni. Heat redistribution chuan tuipui chunga thli tleh dan a khawih danglam bawk a. Pacific Ocean chuan kan chenna lei hmun thuma thena hmun khat lawih a tuam bawk si avangin a temperature inthlak leh chumi avanga thli kal dan inthlak danglam chuan khawvel pumah weather a khawih danglam thin a ni.
January 2024 kha kum 175 chhunga January thla lum ber niin U.S. National Oceanic and Atmospheric Administration te chuan an sawi a. Average global land leh ocean surface temperature pawh chhinchhiah china a san ber record kum 2016 aiin 0.04 degree C in a sang zawk bawk.
Mahse El Nino chu a chak lo tial tial a, hun reilote hnuah a neutral mai dawn thung a. Model thenkhatah chuan La Nina awm theihna monsoon ah a sang tia sawi niin, La Nina a thleng a nih chuan South Asia pumah a bik takin India hmarthlang leh Bangladesh-ah te ruah a sur nasa zual dawn a ni.

Eng nge heatwave?
Temperature sang zual lutuk chu heat wave tia sawi a ni a. IMD te chuan maximum temperature-in phaizawlah 40 degree C a pelh leh tlangrama 30 degree C a pelhin, normal maximum temperature aia 4.5-6.4 degree C a pelhin heat wave a thleng mek tiin a puang thin a ni. Hei bakah hian IMD te chuan actual maximum temperatre in 45 degree C a hawlhin leh 47 degree C a hawlh chuan ‘severe heat wave’ a puang thin bawk.
Air temperature mihring taksa tana hlauhawma a awmin heat wave a awm thei bawk a. Heat wave te India ramah a tlangpuiin March atanga June thlaah a thleng thin a, May chu a vanglai bera ngaih a ni.

Tun hnaia heat wave thlentu?
Journal PLOS Climate tena April 2023 a zirchianna an tihchhuahah khawvel pumah heat wave a nasa tial tial a, a thleng zing tial tial a, a chhan ber chu climate change vang an ti. April 2022 data an zirchiannaah climate change avanga temperature inthlak danglam chuan India ram 90% a nghawng tiin an sawi bawk.
Heat wave thleng zing leh a nat dan chuan India public healthcare mai bakah agricultural output nghawngin chu chuan livelihood, food production, disease spread te thlengin a nghawng vek a ni tiin zirchianna neitute chuan an sawi.
El Nino weather condition thleng mek chu temperature te tisang zualtu niin chu chuan heat wave nasa zawk a thlen tiin mithiamte chuan an sawi bawk.