Aizawl bypass road chungchang…

MNF adviser K Lalsawmvela chuan, Aizawl bypass road siamna tur sawrkar laipuiin sum a phalsak tak chungchangah chief minister Lalduhoma chu thu dik tawk lo sawiah a puh a. CM-in Delhi zin report a peknaah, Aizawl bypass road-a leiverh bik hi harsatna deuh awm vanga cancel hial tum a nih laiin, Road Transport & Highway minister Nitin Gadkari a sawipui hnua pawm leh ni ta angin a sawi a, chu chu thangthat lak duh vanga dik lo taka mipui rilru hruaikawi tumna emaw hriatchian loh vang emaw niin a lang, MNF adviser chuan a ti a.
MNF Adviser hian, chief minister kalchhuak ta Zoramthanga’n PMDevine hnuaiah Aizawl bypass road atan hian a hranpa ngatin Union budget hnuaiah cheng vaibelchhe 500 a sawichhuak… tiin a sawi a. NHIDCL hotute atanga an hriat danin, bypass tunnel hi engtiklai mahin, khawi level-ah mah cancel emaw en that turin emaw rawtna a awm lo, tiin a sawi bawk.
Heta tang hian, MNF adviser leh chief minister te hian mipui hnenah thil awmzia chiang taka ‘evidence’ fel tak nena sawifiah tur an nei ta niin a lang.
A pakhatnaah chuan, MNF Adviser hian chief minister kal chhuak ta Zoramthanga’n PMDevine hnuaiah Aizawl bypass road atan a hranpa ngata Union budget hnuaia cheng vaibelchhe 500 a sawichhuah dan hi a tarlang thei turah ngai ila.
Chutiang bawkin, chief minister ni mek Lalduhoma’n, Aizawl bypass road-a leiverh bik cancel tum a nih dan leh, Road Transport & Highway minister Nitin Gadkari a sawipui dan leh chumi avanga pawm leh chauh a nih dan hi evidence fel tak nen a tarlang thei turah ngai ta bawk ila.
Hetianga thu inkalh a awm hian, thudik zawk finfiah mang loha zuzi ral ta mai mai hi tunhmain a lo awm fo tawh a, hei hi thil tha lo tak a ni. Thu inkalh a awm hian, dik zawk leh dik lo zawk a awm tihna a ni mai a, finfiah zel a ngai; chu chu mipuiin kalphung thar atana kan neih ve a tha ngawt ang.