Hun tha bawhpelh loa BJP MP neih tir ngen

Mizoram mipuiin tun anga hun tha bawhpelh loa, Lok Sabha MP atan BJP candidate vote tling ngei turin a ngen tih BJP State president Vanlalhmuaka chuan a sawi.
MP inthlan tura Lungleia a campaign-naah BJP official candidate Vanlalhmuaka chuan, BJP Mizoram hruaitute chu Kristian an ni a, Hindu ho Pathian hmaah tumah Mizoram atangin an la inthawi ve ngai loa, sakhuana chungchanga BJP theihtawpa beitu Congress chief minister erawh milem pathian hmaah a inthawi tih khawvel hmuha tarlan a ni tih a sawi.
“Hindu hlaututen an tihdan an entawn a, keini Hindu party an tihte erawh chuan an serh leh sang kan khawihpui ngailo thung. Mizoram leh hnam leh kan sakhua a himna tur pawhin BJP Mizoram Kristiante hi kan pawimawh ber dawn a, Mizoram mipuiin tun hun tha hi bawlh pelh loin, BJP MP ngei Mizoram hmasawn nana min thlang turin ka sawm a ni,” a ti.
Lunglei khawpuiin MP-a an thlangtling a nih chuan Lungleiah MZU Southern Campus chu kum khat chhungin a fuction nghal dawn, tia tiamin, Lunglei chu Mizorama khawpui mawi ber a nih tur thu BJP Mizoram president hian a sawi.
“Mizoram mipuiin MP atan min thlangtling a nih chuan central minister ka ni ngei dawn. Central minister atan Mizo Kristian pa ngei neih kan duh a, state dangte awt loa Mizoramin development a taka kan hmuh theih nan min vote turin ka ngen che u a ni,” a ti.