Sa-ah arsa tam ber

Mizoram mipuiin sa chi ruk vel an ei thin a, sa hrang hrangah arsa a tam ber. Vawksain a dawt a, sesa a tlem ber.
Mizoram Economic Survey bu thar berah Mizoramin sa a neih (thar) zat tarlan a ni a, 2022-23 chhung khan sa hi ton 15528 Mizoramin a neih thu leh, a tam ber arsa chu ton 5999 (33.63%) a nih thute tarlan a ni.
Arsa hi Mizoramin a ngah telh telh a, 2017-18 chhunga a neih chu ton 2042 niin, hemi hnu hian kum tin a la pung. 2018-19-ah ton 2181, 2019-20-ah ton 2232, 2020-21-ah ton 4155, 2021-22-ah ton 5740 a nei.
Arsa dawttu chu vawksa a ni a, 2022-23 khan Mizoramin vawksa ton 4886 a nei. A hma chuan vawksa hi Mizoram sa ngah ber a ni thin a, 2021-22 atang khan arsa hian a khum a ni.
Vawksa hi ASF hrilen hnuah a tlahniam duai a, 2019-20 te khan Mizoramin vawksa a neih chu ton 8128 a tling. 2020-21 (ton 6054) leh 2021-22 (tone 4806) te khan a tlahniam a, mahse 2022-23-ah a pung leh.
Arsa leh vawksa dawtah bawngsa a awm a, 2022-23 khan Mizoramin ton 4185 a nei. Kelsa ton 192, lawisa ton 191 leh sesa ton 75 te a nei bawk.