Mizoram House hralh thu ah Supreme Court thlen kan tum – Lalduhoma

Kolkata Ballygunge-a Mizoram House chungchanga High Court thuthluknaah Mizoram sawrkar chu Supreme Court thlengin a tul angin a kal zel dawn tih chief minister Lalduhoma chuan a sawi.MP inthlan tura Saikawrdai tlangdunga campaign-a a chhuahnaah ZPM leader ni bawk Lalduhoma chuan, MNF sawrkarin Ballygunge road-a Mizoram House a hralh ngawt kha a pawi a, an ni chuan hralh an phal loa, neih belh aia neihsa tiral zawnga an khawsa kha mak an ti, tia sawiin, “High Court-ah thiam chang lo mah ila, Supreme Court thlengin a tul angin zelin kal kan tum a, a tawp kan thleng dawn,” a ti.
MNF vice president-in Mizoram House chungchangah ZPM sawrkar chu Calcutta High Court laka mualpho leh mipui bum an tumna laihlan sak anga a sawi chu, pute sulhnu pawr sawimam tum ringawta hmanhlel a nihna a lang leh taah an ngai tih sawiin, “Ballygunge road Kolkata-a House awmna hi khawpui laili a ni a, hmun hla zawk Salt Lake leh New Town pan pha ve lo miharsa zawkte tan a hlu takzet. Khawpui lailia awm a nih avangin MNF sawrkarin an hralhna man pawh a sang a, cheng vaibelchhe 38 chuang niin a tirah chuan a hralhna atangin hmun dangah a aia tha zawk tur Mizoram House sak kha sawi a awm a, mahse hetiang lam bawhzuina reng reng a awm ta si loa, a hralh ringawtah hmanhmawh deuha nawrna a awm a ni ber,” Lalduhoma hian a ti.
MNF sawrkarin vbch. 38 chuanga a hralhnaah MoU atanga a lan danin, clause pahnihah cancel leh theihna a awm a, mah se, file an zirchian hnuah sale deed an la ziahpui loh avang leh a neitu thar hmanga registration tih a la awm o bawk nen sawrkarin a cancel ta a. Mak tak maiin High Court-a khin an ni a, thiam loh an chang lailawk a ni ta ber tih a sawi.
He hmun leitu Excel Vincom Pvt Ltd. phenah mawng lang kukin tute emaw chu an thu nia a lan thu chief minister hian sawiin, “Helai hmuna Building regulations an hman lai hi G+3 (ground floor bakah chhawng thum) ni mah se, a bul lawkah pawh in chhawng sang tak tak a tam a, chhawng thum bakah chhawng hnih dang sak belh theihna DPR thar siamin West Bengal sawrkara an Housing minister leh Municipal mayor hnenah chhawng hnih dang sak phalsakna tur dila hma lak tum laiin, phur takin Calcutta High Court-ah min khing a, court thuthlukna vang hian MNF an lawm hle a ni. Ram leitu company ang maia hnehna hlado an lo chham ve chiam mai hi a zahthlak a, Mizo mipui min zah lohnaah kan ngai,” a ti.
A hmuna cheng leh hrechiangtu Kolkata Mizo mipui leh Mizo Welfare pawhin House hralh hi pawi an tih thu thlenin thuchhuah an siam hial tih ZPM hruaitu hian a sawi a. Politics-a hamthatna lak tumnaa inpuh chi a ni loa, Mizoram mipui hamthatna tur zawk a nih zia kan hrethiam vek, tiin a sawi a ni.